Hatutan.com, (12 Fevereiru 2025), Díli- Embaixadór Estraordináriu no Plenipotensiáriu dezignadu ba Suisa, António da Conceição “Kalohan” kompromete fó kontinuidade ba servisu sira kooperasaun bilaterál entre Timor-Leste no Suisa hodi hametin lasu amizade entre país rua iha futuru.

Lee Mós: António “Kalohan”, Embaixadór Timor-Leste ba Suisa

Prezidente Repúblika, José Ramos-Horta asina termu posse ba Embaixadór Estraordináriu no Plenipotensiáriu dezignadu ba Suisa, António da Conceição “Kalohan”, Kinta (12/02/2025). Foto/Elio dos Santos da Costa

Embaixadór António da Conceição “Kalohan” nu’udár mós Sekretáriu Jerál Partidu Demokrátiku   hato’o deklarasaun ne’e hafoin simu posse husi Prezidente Repúblika José Ramos-Horta, Kuarta (12/02/2024) iha Palásiu Prezidensiál.

“Hanesan embaixadór ne’ebé mak laos Primeiru postu, maibé iha ona Embaixadór lubuk ida ne’ebé mak hala’o tiha ona misaun iha Suisa sertamente primeira prioridade mak  fó kontinuidade ba diplomasia ne’ebé mak Embaixadór sira uluk ezerse tiha ona iha Jenebra, ne’ebé ligadu mos ba Nasoins Unidas nia organizasaun sira ne’ebé rezidente iha Jenebra ne’ebá no ezerse mos funsaun ida ne’ebé halo nafatin relasaun bilaterál ho Suisa mesmu rai ne’e mós dook ba Timor-Leste, maibé nafatin tenke promove interese ida ne’ebé presiza atu promove ho governu Suisa,” Embaixadór António da Conceição “Kalohan” hateten.

Kalohan hatutan iha ona koñesimentu no  hetan mos informasaun badak ne’ebé lee hetan, Suisa iha mos apoiu ba Sosiedade Sivíl iha Timor ba atividade ho eskala ki’ik, no ida ne’e sertamente atividade ida ne’ebé Suisa labele ezerse bilaterálmente ho governu mas sira bele halo atividade sira ne’e ho organizasaun Sosiedade Sivíl sira.

Em termos de kooperasaun bilaterál atu kontinua servisu sira ne’e no mos promove tan hanoin foun ruma ne’ebé mak depende ba kontextu Timor-Leste nian, bainhira ita hakarak halao dezenvolvimentu no mos halo kooperasaun ho nasaun Suisa.

Atu ba fo kontinuidade ba servisu sira ne’ebé Embaixadór sira uluk halo tiha ona, ligadu ba kestaun direitu humanos, kestaun resentes ba kestaun ne’ebé Timor-Leste foin tama ligadu ho WTO, no mos kestaun sira seluk ne’ebé ita presija akompaña ligadu ho mundu global ne’ebé ohin loron lao hela dadauk.

“Pessoalmente ha’u seidauk bele dehan saida mak ha’u hanoin hanesan prióridade lolos ba ha’u, tamba ha’u sei halo konsulta ho MNEK para depois para bele fo orientasaun prióridade Timor-Leste nia atu promove iha ne’eba.” Tenik nia.

Iha fatin hanesan, Sekretáriu Jerál MNEK, João de Câmara hateten Ohin aprejentasaun karta kredensiál Embaixadór António da Conceicão ba Suisa Sede iha Jenebra, maibé Embaixadora sesante fila tiha ona, agora Embaixadór foun ba fali nune’e labele husik Embaixada iha Suisa mamuk de’it.

“Embaixadór António da Conceicão la’ós de’it sai Embaixadór bilaterál katak ba país Suisa mas ba mós nasaun unidas.” Hateten João de Câmara.

Purtantu asume funsaun rua, neen responsabilidade bo’ot reprezenta ita nia nasaun iha rai li’ur. Ita nia esperansa ba ita nia Embaixadór atu bele halo servisu iha Suisa ho susesu, reprezenta ita nia Timor ho susesu iha Uniaun Europeia ninian rain.

Ramos-Horta husu Kalohan hola pozisaun reprezenta estadu iha Jenebra

Embaixadór António da Conceição “Kalohan” hateten hafoin simu posse ohin mos halo enkontru ho Prezidente Repúblika José Ramos-Horta atu rona nia hanoin, prióridade sira ne’ebé mak xefe estadu rasik mos hanoin kona-ba servisu ne’ebé maka Embaixadór bele halo iha Jenebra ninian.

Kalohan hatutan Imi hatene katak Timor-Leste tama iha membru Nasoens Unidas, ita presija partisipa iha,sesaun hotu-hotu, presija partisipa iha diálogu hotu-hotu, no hanesan mos membru Timor-Leste mos hola responsabilidade ativu iha membru nian.

“Prezidente Repúblika fo hanoin atu pondera situasaun ho di’ak, molok hola Pozisaun ne’ebé maka reprezenta estadu Timor-Leste.” Hateten António da Conceição “Kalohan”.

Prezidente Repúblika fo Konsellu atu prióridade ne’ebé mak halo em termos de partisipasaun iha alto polítika ruma maka hola iha Jenebra ninian presija konsulta mai iha Prezidente Republika no mos MNEK hodi hare Timor-Leste nia Pojisaun ida ne’ebé mak diak.

Jornalista: Vito Salvadór