Hatutan.com (20 Fevereiru 2025), Díli– Komisaun B Parlamentu Nasionál (PN) ne’ebé trata asuntu Negósiu Estranjeiru no Defeza Seguransa, Kinta (20/02/2025), halo enkontru ho embaixadora Estadu Unidu Amérika (EUA), Donna Ann Welton hodi ko’alia kona-bá apoiu EUA nian iha Timor-Leste.

Lee Mós: TL ho EUA Hametin Kooperasaun Defeza no Esplora Oportunidade

Embaixadora EUA mai TL, Donna Ann Welton hasoru malu ho Komisaun B-PN, Kinta (20/02/2025). Foto/Zita Menezes

Prezidenti Komisaun B-PN Domingos Augosto “Deker” hateten ho objetivu primeiru mak Estadu Unidu Amérika liuhosi sira-nia embaixada  iha Timor-Leste partilla informasaun kona-bá ajudu ne’ebé Amérika halo liuhosi areá oin-oin iha Timor-Leste  ne’ebé balun la’o tiha ona no balun daudaun ne’e la’o hela.

Segundu bazeia bá politiká husi Prezidenti foun  Amérika nian, Donald Trump, ne’ebé halo mudansa  politiká kooperasaun ho rai seluk, liuliu koopersaun iha áree billaterál, ne’ebé halo nasaun barak preokupadu uituan. Felizmente, Embaixadora Amérika nian iha Timor-Leste,  Donna Ann Welton rasik saliénta katák Amérika nia apoiu  mai Timor-Leste ne’e mantein nafatin.

Iha enkontru ne’e Embaixadora Donna Ann Welton informa mós katák politiká ne’e agora iha hela prosesu nian laran, rezultadu ikus mai oinsá Embaixadora rasik sei up-date fila-fali bá públiku liuhosi komisaun B-PN.

Rekomendasaun ne’ebé Embaixadora  Donna Ann Welton fó bá Komisaun-B  nu’udár mós reprezentante povu iha rai ida-ne’e asume responsabilidade atu halo akompañamentu no fiskaliza programa hotu-hotu ne’ebé Estadu Unidu Amérika (EUA) apoiu bá Timor-Leste liuliu iha área Defeza Seguransa, Agrikulturá Edukasaun no selu-seluk tán.

Komisaun B-PN husu bá Estadu Unidu Amérika (EUA), tenke konsiénte katák Timor-Leste hanesan labarik ka joven ida ne’ebé foin aprende atu la’o no hein nafatin apoiu hotu husi EUA bá Timor-Leste ninian dezemvolvimentu, defeza seguransa no politiká ekonómia.

Jornalista Estajiária : Zita Menezes