Hatutan.com, (26 Fevereiru 2025), Díli– IX Governu Konstitusionál liu husi Sorumutu Konsellu Ministrus, Kuarta (26/02/2025), aprova hodi autoriza realizasaun despeza ho montante millaun $15 relasiona ho atribuisaun subvensaun anuál ida ba Konferénsia Episkopál Timorense (CET-portugés) durante tinan 2025.

Lee Mós: Governu-CET Asina Akordu Subvensaun Anuál Millaun $15 

Dezeñu Igreja foun Katedrál Dioseze Baucau. Foto/Repro GASC

Komunikadu ba Imprensa ne’ebé Hatutan.com asesu husi Gabinete Ministru Prezidensia Konsellu Ministrus, haktuir projetu ne’ebé aprezenta husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, Konsellu Ministrus delibera hodi autoriza realizasaun despeza ho montante millaun $ 5 relasiona ho atribuisaun subvensaun anuál ida ba CET ne’ebé hala’o durante tinan 2025.

Subvensaun anuál ba Konferénsia Episkopál Timorense ne’e sei realiza tuir akordu ne’ebé asina ona iha loron 14 fulan-Agostu 2015 entre Timor-Leste no Santa Sé, nune’e mós Akordu-Kuadru ne’ebé asina iha loron 16 fulan-Juñu 2017 entre Governu no CET, ne’ebé prevee kontribuisaun anuál ida, tuir disponibilidade finanseira Governu nian ba atividades ho karakter sosiál, edukativu no governu ekleziál Igreja Katólika nian.

Konsellu Ministrus aprova mós projetu Rezolusaun Governu nian, ne’ebé aprezenta mós hosi Vise-Ministra Milena da Costa Rangel, hodi aprova kontribuisaun voluntária Timor-Leste nian ho valór $155,810 ba Fundu Espesiál Komunidade País Lian Portugés nian (CPLP-portugés), ne’ebé aloka ba finansiamentu projetu “Luzofonia iha Timor-Leste”.

Projetu ida-ne’e, dezenvolve iha ámbitu CPLP nian, ho objetivu atu promove no divulga lian portugés iha Timor-Leste no hala’o hela hosi jornál diáriu online timorense DiliGente, meiu komunikasaun sosiál úniku nasionál ne’ebé fó-sai de’it iha lian portugés.

Konsellu Ministrus aprova mós projetu Rezolusaun Governu nian ida hodi atribui Doasaun ida ho montante dolar amerikanu  rihun 60 ba Reprezentasaun Permanente Repúblika Árabe Saarauí Demokrátika iha Timor-Leste, ne’ebé aprezenta hosi Vise-Ministra ba Asuntu ASEAN, Milena Maria da Costa Rangel.

Medida ida-ne’e hametin lasu istóriku ne’ebé liga Timor-Leste no Repúblika Árabe Saaraui Demokrátika, bazeia ba dezeju komún hodi luta ba autodeterminasaun, iha prinsípiu solidariedade ba luta povu nian ba libertasaun nasionál no direitu ba autodeterminasaun no independénsia, ne’ebé hatuur iha Konstituisaun Repúblika, iha Rezolusaun Parlamentu Nasionál kona-ba solidariedade no apoiu ba povu Saaraui, no iha faktu katak Timor-Leste kontribui husikedas tinan 2011, ba funsionamentu Reprezentasaun Permanente iha Dili, liuhusi fó subsídiu anuál hodi hala’o sira-nia atividade iha Timor-Leste no iha rejiaun ne’e.

Tuir projetu ne’ebé aprezenta husi Ministru Agrikultura, Pekuária, Peska no Florestas, Marcos da Cruz, delibera hodi autoriza halo despeza ho montante millaun $16,997 ba konstrusaun projetu irrigasaun Maukola-Lomea iha Munisípiu Covalima.

Jornalista : Vito Salvadór