Hatutan.com, (05 Marsu 2025), Díli- Arsebispu Arkidioseze Metropolitana Díli, Dom Virgílio Kardeál do Carmo da Silva, SDB, hateten Kuarezma mak tempu atu ema hetan fila fali dalan no lori ema fila hikas ba nia objetivu moris nian liu husi dalan tolu mak Orasaun, Karidade (ezmola) no jejúm (abstinénsia).

Lee Mós: Mensajen Papa Francisco Ba Kuarezma 2025: “Mai Ita La’o Hamutuk iha Esperansa”

Arsebispu Arkidioseze Metropolitana Díli, Dom Virgílio Kardeál do Carmo da Silva, SDB kose ahu-kadesan ba sarani sira-nia ren-toos iha Misa Kuarta-Feira Sinzas, (05/03/2025). Foto/Elio dos Santos da Costa

Arsebispu Arkidioseze Metropolitana Díli, Dom Virgílio Kardeál do Carmo da Silva, SDB hato’o lia hirak ne’e bainhira prezide misa Kuarta-feira Sinzas, (05/03/2025), iha Igreja Parókia Katedral Imaculada Conceição, Vila Verde, Díli.

“Kuarezma mak tempu atu ita hetan fila fali rota, ita hetan fila fali diresaun moris nian. Iha moris buat ida vale liu mai ita mak oinsá ita la lakónika nia meta moris ninian, ita-nia finalidade moris ne’e nian. Tamba ne’e fila ba Maromak liu husi Kristu, Nia mak sai ita-nia finalidade, objetivu moris nian. Mai ita konsistente iha ita nia Fiar ho Orasaun, Karidade (ezmola) no jejúm (abstinénsia) hodi manan dalan salvasaun nian,” Dom Virgílio Kardeál do Carmo da Silva, SDB hateten.

Arsebispu hatutan ahu-kadesan ne’ebé sei kose iha ema nia ulun nu’udár sinál ida atu fó hanoin hikas ba ema kona-bá lia-loos, no revela ba ema verdade ida.

Dala ruma loron tomak, husi dadeer too kalan, ema preokupa liu no duni de’it buat ruma ne’ebé folin laek, hanesan ahu-kadesan ne’ebé anin huu lakon tiha de’it, no buat sira ne’e hotu provizóriu de’it. Podér ohin ema iha, aban bele liu ka lakon fali. Ohin, ema ida susesu, aban nia bele nabeen, tamba ne’e buat hotu la permanénsia ho ema, buat ne’ebé permanénsia mak hahalok di’ak no domin Maromak nian.

Dalaruma ema moris iha sosiedade ida-ne’ebé nakonu ho kultura aparénsia katak buat ne’ebé ema haree, buat ne’ebé ema halo, buat ne’ebé viríl no dala barak ema monu ba tentasaun sira no situasaun obriga atu halo tuir buat ne’ebé ema seluk halo, no monu ba bosok no finjidu, tamba ne’e Kuarezma hanesan tempu atu ema liberta nia an husi Iluzaun hodi moris tuir Maromak nia ukun fuan.

“Kuarezma bolu ita, atu fila fali ba buat ne’ebé esensiál, buat ne’ebé importante iha ita nia moris. Hanesan Jesus hateten iha Evanjellu oinsá mak ita buka halo didi’ak ita-nia pratika moris sira ne’e, ho fuan no laran, la ho finjimentu, la ho ipokrizia, kona-ba ezmola, Orasaun, jejúm no abstinénsia,” Arsebispu Arkidioseze Díli ne’e tenik.

Arsebispu Arkidioseze Metropolitana Díli, Dom Virgílio Kardeál do Carmo da Silva, SDB, kose ahu-kadesan ba sarani sira-nia ren-toos. Foto/Elio dos Santos da Costa

Dom Virgílio subliña kada tinan iha selebrasaun Kuarta-feira Sinzas hodi hahú tempu Kuarezma ka tempu hadera aan, sarani fiar na’in sira sempre rona fila-fila kona-ba Orasaun, Karidade (ezmola) no jejúm (abstinénsia).

Benefísiu husi Orasaun, Karidade (ezmola), Jejum (abstinénsia) mak liga ema ba realidade ida-ne’ebé permanénsia nafatin, orasaun liga ema ba Maromak, ezmola lori ema ba nia maluk sira, halo karidade no tulun malu, ikus liu Jejúm no abstinénsia lori ema fila hikas ba nia an.

Dom Virgilio Kardeál do Carmo da Silva  husu sarani fiar na’in sira hotu, haka’as aan ba, atu iha tempu Kuarezma ka tempu hadera aan ida ne’e, ida-idak kumpre ho fuan mós nia obrigasaun sira hodi moris tuir Santa Kreda nia ukun-fuan no moris tuir Maromak Nia ukun-fuan sira atu manan moris Santu iha rai ne’e no moris rohan-laek iha loron ikus.

Jornalista: Elio dos Santos