Hatutan.com, (12 Marsu 2025), Díli– Ministru Asuntu Kombatente Libertasaun Nasional (MACLN, sigla portugés), Gil da Costa Monteiro “Oan-Soru” husu ba populasaun hotu iha territóriu Timor-Leste atu lalika rona ema ka lider no grupu balu politiza asuntu veteranu.

Lee Mós: MACLN Enkoraja Veteranu Sira no Públiku Submete Reklamasaun ba CCLN Kada Munisípiu

Ministru Asuntu Kombatente no Libertasaun Nasionál, (MACLN, sigla portugés), Gil da Costa Monteiro “Oan Soru” . Foto/Tome da Silva

“Iha lider balu, ema balu, iha grupu balu iha Oé-cusse no mós iha territóriu Timor-Leste tomak agora komesa ba kaer ona asuntu veteranu hodi politiza iha populasaun nia-leet ne’ebe atu apela lalika politiza asuntu veteranu,” Ministru  Gil da Costa Monteiro “Oan-Soru” hateten ba jornalista sira hafoin  reunion Konsellu Ministru iha Palasiu Governu, Díli, Kuarta (12/03/2025).

Gil Oan Soru husu ba hotu-hotu liuliu veteranu sira atu lalika rona ema ida ka grupu ne’ebe lori atributu ba tau halo modelu oioin hodi politiza tanba iha ema balu dehan sira hamutuk ho Xanana atu fa’an tiha rai Naktuka.  

“Tansá uluk Xanana la fa’an tiha Timor para lalika ukun aan tanba ne’e hateten ba públiku atu labele rona buat aat sira ne’e. Ministru ida naran Gil “Oan Soru” ne’e nia partidu CNRT mas nia la halo servisu ba nia partidu. Ha’u halo servisu ba nasaun ho povu nia interese,” Gil da Costa Monteiro “Oan-Soru” afirma.

Nia husu ba públiku dala ida tan  nu’udar Ministru nia pozisaun klaru hela tanba ne’e iha artigu 35 estatutu Kombatente Libertasaun Nasional númeru 01, hatete iha ne’ebá dehan konsellu dos Kombatentes da Libertasaun Nasional mak úniku órgaun ne’ebe mak reprezenta interese hotu-hotu ba veteranu nian ho nune’e iha veteranu ida mak nia atu iha Partidu  FRETILIN, CNRT, PD ka partidu saida de’it maibé asuntu veteranu ne’e lalika partidária.

Jornalista Estajiáriu : Lazaro Pereira Quefi