Hatutan.com, (13 Marsu 2025), Díli- Prezidente Repúblika (PR), José Ramos-Horta, hato’o votu kmanek no parabeniza Santu Padre Papa Francisco ne’ebé selebra aniversáriu pontifisiu bá dala-XII.

Lee Mós: Mgr. Marco Sprizzi husu Timoroan Reza bá Papa Francisco Nia Saúde

PR Ramos-Horta hasoru malu ho Papa Francisco iha Vatikanu, Segunda (22/01/2024). Foto/Vito Salvadór

Iha komunikadu ne’ebé Hatutan.com asesu husi Gabinete Média Palásiu Prezidensiál, Kinta (13/03/2025), relata Prezidente Repúblika José Ramos-Horta hato’o ninia orasaun ho laran tomak no votu kmanek ba Sua Santidade Papa Francisco iha nia aniversáriu pontifikadu ba dala-XII

Iha mensajen ba Santu Padre iha loron 13 fulan-Marsu 2025, Prezidente Ramos-Horta hato’o solidariedade espirituál povu Timor nian durante okaziaun signifikativu ida ne’e.

“Iha loron espesiál ne’e, ne’ebé marka ninia Pontifikadu aniversáriu ba dala-12, ami akompaña ho esperansa no orasaun evolusaun Santu Padre nia saúde, hametin fila-fali ami-nia deseju ba ninia rekuperasaun lalais,” Ramos-Horta hateten.

Hein katak Maromak haforsa nia no haraik rekuperasaun tomak ba nia, , atu nune’e nia bele kontinua fó naroman mai ita ho nia matenek no laran-sadia.

Prezidente Repúblika reflete kona-ba impaktu kle’an husi Papa Francisco nia vizita Apostólika istóriku mai Timor-Leste husi loron 9-11 fulan-Setembru 2024, ne’ebé haforsa relasaun profundu entre Timor-Leste no Santa Sé, husik hela impaktu sosiál, relijiozu no espirituál ne’ebé sei dura ba jerasaun hotu-hotu.

“Prezensa Santu Padre iha ita-nia nasaun halo foun ita-nia kompromisu katak ‘ita-nia fé kontinua sai ita-nia kultura,’ hodi hametin liután valór sira dame nian, fraternidade no dignidade umana,” Prezidente deklara.

Mensajen esperansa no solidariedade ne’ebé transmitidu durante ninia vizita kontinua fó inspirasaun ba povu Timor-Leste iha konstrusaun sosiedade ida ne’ebé justu no armonia liu.

Xefe Estadu hato’o agradesimentu ba lideransa Santu Padre nian, hodi nota oinsá ninia Pontifikadu sai nu’udar fonte orientasaun espirituál no inspirasaun ba sarani millaun resin iha mundu tomak, inklui povu Timor-Leste ne’ebé hetan forsa iha ninia mensajen sira kona-ba fé, domin, justisa, pás, no solidariedade.

Prezidente Ramos-Horta louva Santu Padre ninia ezemplu haraik-an no servisu ne’ebé kontinua sai matadalan mai ita, liuliu bainhira hasoru dezafiu globál sira ne’ebé ita hasoru. Ninia lian profétiku iha defeza ba sira ne’ebé vulneravel liu no kuidadu ba ita-nia Uma Komún sai nafatin hanesan naroman ba umanidade.

Ramos-Horta hato’o ninia agradesimentu profundu ba Santu Padre ninia servisu ne’ebé la hatene kolen ba Igreja no mundu, no kontinua halo orasaun ba ninia saúde, forsa, no matenek iha ninia misaun ba domin no pás.

Jornalista: Elio dos Santos