Hatutan.com, (13 Marsu 2025), Díli– Tuir levantamentu ka survey Ministériu Negósiu Estranjeiru no Kooperasaun (MNEK) nian kona-bá saláriu ka remunerasaun diplomata Timoroan nian iha diaspora ka iha estranjeiru boot dala-rua kompara ho diplomata sira seluk husi nasaun seluk.

Ministru Negosiu Estranjeiru no Kooperasaun (MNEK), Bendito Freitas. Foto/Zita Menezes

Ministru Negosiu Estranjeiru no Kooperasaun (MNEK), Bendito Freitas, Kinta (13/03/2025), hateten MNEK halo enkontru ho komisaun B-PN hodi klarifiká jestaun finanseiru liuliu kona-bá saláriu  diplomata Timoroan sira ne’ebé halo misaun iha rai li’ur.

Bazeia bá regra sempre tuir prinsipíu halo ajustamentu no atualizasaun bá subsidiu bá diplomata sira iha bazé no mós kona-bá referénsia bá eskala salariál Nasoins Unida kona-bá grau profisionál no mós nivél diplomata bá altu nivél nian.

“Atu dehan bá ita-boot sira katák subsidíu ne’ebé fó bá diplomata sira boot liu país Portugal, Indonézia, no iha nivél tabela ne’ebé ami halo survey hotu, ita nian saláriu bá diplomata sira boot liu dala-rua. Ha’u lakohi temi numeru, maibé ida-ne’e para ita-boot sira-nia entendimentu  katák situasaun ida-ne’e Timor presiza iha sustentabilidade bá estadu no nasaun,” Ministru Bendito Fretias hateten hafoin halo enkontru ho Komisaun B-PN  iha PN.  

MNEK halo esforsu institusionál atu tau bazé ne’ebé propriu adekuadu kona-bá jestaun bá subsidiu bá diplomata sira, tanba komparasaun katák durante tinan hirak bá kotuk MNEK seidauk iha regra ida propriu atu jere no administra subsidiu bá diplomata sira.

Mnistru Bendito Freitas afirma MNEK mós  aprezenta asuntu ne’e iha Reniaun Konsellu Ministru  nune’e hetan apoiu husi Primeiru-Ministru Kay Rala Xanana Gusmão katák tenke revé imediatu nune’e bele tau bazé ne’ebé mak propriu.

Nia hatán mós katák 40% MNEK  la korte, totál ne’ebé fó diplomata sira bá (living alounce) ne’e katák 60% bá sira nian living  40% bá diplomata sira nian uma iha estranjeiru.

Iha fatin hanesan Prezidenti Komisaun B-PN ne’ebé trata asuntu Negosíu Estranjeiru, Defeza no Seguransa, Domingos Augosto “Deker” hateten komisaun B halo audiénsia urjenti ho Ministru Negosiu Estranjeiru no Kooperasaun (MNEK) atu halo klarifikasaun kona-bá públiku nian preokupasaun katák MNEK ko’a diplomata sira nian saláriu 40%.

“Depois ami rona klarifikasaun no resposta sira husi Ministru MNEK no ekipa hatudu katák, redusaun iha parte balu ne’ebé hatudu responsabilidade bá kestaun administrasaun. Presiza duni haree bá nian natureza no presiza duni halo redusaun aselera bá reajustamentu,” Deputadu “Deker” hateten.

Komisaun B rekomenda bá MNEK atu kria regra ida hodi bele halo definisaun bá saláriu ka subsidíu diplomata iha estanjeiru.

Jornalista Estajiária: Zita Menezes