Hatutan.com (25 Marsu 2025), Díli- Prezidente Repúblika (PR), José Ramos Horta hateten nia parte lakohi komenta ba desizaun Supremu Tribunál Justisa (STJ) ne’ebé la halo estradisaun ba fujitivu  Polísia Kriminál Internasionál (INTERPOL) Arnolfo Arnie Alipit Teves Jr.

Lee Mós: Horta Afirma Fujitivu Arnolfo Teves Jr La Prienxe Rekizitu Azíliu Polítika iha Timor-Leste

Prezidente Repúblika, José Ramos-Horta. Foto/Tome da Silva

“Buat ida mak ne’e, ita-boot sira lee didi’ak Tribunál nia desizaun, ha’u la komenta, respeita,” Prezidente Repúblika (PR), José Ramos-Horta ba Jornalista sira iha Palásiu Prezidensiál, Tersa (25/03/2025).

Xefe Estadu RDTL ne’e  hateten Tribunál pronunsia de’it, bele halo estradisaun ka la’e, Tribunál la hatete, se nia bele hela iha Timor ka la’e, fó direitu ba nia atu hela iha Timor ka la’e, ne’e Tribunál hatete.

Ramos-Horta mós halo ona reuniaun ho Primeiru-Ministru (PM), Kay Rala Xanana Gusmão, hodi ko’alia kona-bá desizaun Tribunál nian ba  fujitivu Arnolfo Teves Jr, ne’ebé Tribunál la halo estradisaun ba nia nasaun orijen Filipina.

“Ha’u reuniaun tiha ona ho Primeiru-Ministru pontu de vista tékniku jurídiku, Tribunál nia opiniaun ne’e loos,” Ramos-Horta tenik.

Ramos-Horta mós konfirma katak, desizaun Tribunál nian la implika ba Timor-Leste nia adezaun ba membru plenu  ASEAN.

“Ne’e desizaun polítika ona Timor-Leste nian. Implika ba Timor-Leste nia adezaun ASEAN, laiha impaktu buat sira ne’e normál akontese,” PR José Ramos-Horta hateten.

Supremu Tribunál Justisa  (STJ)  halo tiha análize ba rekursu ne’ebé hato’o husi ekipa defeza Arnolfo Teves Jr, Kuarta (20/03/2025), deside indefere pedidu estradisaun ne’ebé hato’o husi Governu Filipina bá fijitivu  Arnolfo Teves Jr.

Lembra fali katak fujitivu red notice hosi INTERPOL ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.

Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli,  tempu ne’ebá, deskonfia simu direta hosi asesór prinsipál Prezidente Repúblika nian tempu ne’ebá.

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia. 

Lee Mós: STJ Deside La Halo Estradisaun, Fujitivu INTERPOL Teves Jr Agradese Bá Governu Timor-Leste

Jornalista: Tome da Silva