Hatutan.com, (28 Marsu 2025), Díli-Fujitivu Polísia Kriminál Internasionál (INTERPOL, sigla Inglés), Arnolfo Arnie Teves Jr hamutuk ho komunidade  Filipina sira ne’ebé oras ne’e hela iha territóriu Timor-Leste, Sesta (28/03/2025) deklara ba públiku katak sira fó apoiu totál ba Timor-Leste nia adezaun ba organizasaun rejionál Association of Southeast Asian Nation (ASEAN).

Lee Mós: Justisa Timor-Leste Deside La Estradita Fujitivu INTERPOL Arnolfo Teves Jr

Komunidade Filipina iha Timor-Leste hamutuk ho fujitivu INTERPOL Arnolfo Teves Jr fó apoiu tomak adezaun TL nian ba membru plenu ASEAN. Foto/Elio dos Santos da Costa

Diretór Things to come mission Association Timor-Leste, Aaron Arsino ba jornalista sira iha resintu jardín Motael, Díli, hateten hanesan sidadaun Filipina ne’ebé hela iha Timor-Leste, iha unidade no halibur malu iha nu’udár loron espesiál atu apoiu Timor-Leste.

“Ami mos iha ne’e atu fó ami nia apoiu ba esforsu sira ne’ebé nasaun Timor-Leste esforsu hela atu sai membru ASEAN nian,” Aaron Arsino hateten.

Sidadaun ho nasionalidade Filipina ne’e hatutan asaun ne’e sira halo tamba akompaña iha média sira iha Filipina ne’ebé hateten katak ho desizaun Supremu Tribunál Justisa la estradita fujitivu INTERPOL Arnolfo Teves Jr ba Filipina sei fó influénsia negativa ba Timor-Leste nia adezaun ba ASEAN.

Nia haktuir mós katak haree ba prosesu dezenvolvimentu ne’ebé Timor-Leste iha hatudu progresu pozitivu no iha mudansa signifikativu tamba ne’e apoiu totál ba Timor-Leste nia adezaun ba ASEAN.

“Hanesan ema Filipina, ami mós iha direitu atu apoiu Timor-Leste nia adezaun ba ASEAN.” Nia subliña.

Diretór Lighthouse International School, Noel Reboyun hateten Timor-Leste hanesan nia uma darauk, nia hadomi Timor-Leste tamba ne’e sei halo esforsu hotu hodi apoiu Timor-Leste nia adezaun ba ASEAN.

“Ha’u ho ha’u nia maluk Filipina hotu ne’ebé hela iha Timor-Leste, ami hotu apoiu Timor-Leste nia adezaun ba ASEAN,” Noel Reboyun afirma.

Nia hatutan Timor-Leste hanesan país ida ne’ebé nia demokrasia kapás tebes, tamba ne’e espera Timor-Leste bele hola parte lalais ona hanesan membru ASEAN.

Biban ne’e, Arnolfo Teves Jr fujitivu INTERPOL ne’ebé STJ bedside la estradita ba Filipina hateten hamutuk ho komunidade Filipina ne’ebé hela iha Timor-Leste ho kompromisu tomak apoiu Timor-Leste nia adezaun ba ASEAN.

“Ami hotu-hotu sidadaun Filipina ne’ebé iha Timor suporta no hakarak Timor-Leste bele lalais ona sai membru ASEAN,” Arnolfo Teves Jr afirma.

Ezije Ba ICC Liberta  Rodrigo Durtete Fila Ba Filipina

Komunidade Filipina iha Timor-Leste hamutuk ho fujitivu INTERPOL Arnolfo Teves Jr fó apoiu tomak adezaun TL nian ba membru plenu ASEAN. Foto/Elio dos Santos da Costa

Komunidade Filipina ne’ebé hela iha Timor-Leste óos husu ba Tribunál Justisa Internasionál ka International Criminal Court (ICC)  atu liberta hikas eis Prezidente Filipina Rodrigo Durtete ba Filipina.

“Ami mós husu no ezije ba iha Tribunál Justisa internasionál ka ICC atu liberta ami nia aman Rodrigo Durtete ba Filipina tamba nia la sala,” Sheramil Faith Casas hateten.

Iha fatin hanesan Joaquin G. Ravina hateten sira hamutuk ezije ba ICC atu liberta ami nia eis Prezidente Rodrigo Durtete Filipina tamba Filipina la hola ona parte ba akordu ICC.

“Ami husu atu liberta nia, husik nia livre, ami iha ne’e atu apoia nia,” hateten Joaquin G. Ravina.

Atu fó hanoin fali katak, eis Prezidente Filipina Rodrigo Durtete hetan kapturasaun husi Polísia Kriminál Internasionál (INTERPOL, sigla Inglés), Tersa (11/03/2025) hafoin simu karta kapturasaun ne’ebé hasai husi ICC.

Jornalista: Elio dos Santos