Hatutan.com, (03 Abríl 2025), Díli – Xefe Gabinete Guarda Nasionál, Miniastériu Defeza Estadus Unidus Amérika, Jenerál Steven S. Nordhaus vizita Timor-Leste hodi hametin kooperasaun militár iha ámbitu programa parseria Estadu nian.

Jenerál Steven S. Nordhaus. Foto/Espesiál

Komunikadu imprensa ne’ebé Hatutan.com asesu husi Embaixada Estadus Unidus Amérika nian iha Díli revela katak Jenerál Nordhaus nia vizita subliña importánsia hosi kolaborasaun kontínua entre Estadus Unidus Amérika no Timor-Leste iha setór defeza no vizaun hamutuk ba futuru ida ne’ebé seguru no prósperu.

Durante ninia vizita, Jenerál Nordhaus halo ona diskusaun altu nível hirak ho Prezidente José Ramos-Horta, Primeiru-Ministru Xanana Gusmão, Ministru Defeza Donaciano do Rosário Gomes, no Vise Xefe Estadu Maiór Jenerál Majór Jenerál Calisto dos Santos Coliati.

Enkontru hirak ne’e, ne’ebé hala’o iha ámbitu Programa Parseria Estadu nian, subliña Estadus Unidus Amérika nia kompromisu ba tempu naruk hodi reforsa lasus seguransa nian ho Timor-Leste.

Diskusaun hirak ne’e foku ba hakle’an kooperasaun militár bilaterál, hasa’e kapasidade defeza nian, no fasilita interkámbiu perísia estratéjiku sira hodi apoia estabilidade no seguransa rejionál iha Indo-Pasífiku.

Jenerál Nordhaus mós sei partisipa iha serimónia ofisiál entrega Hangar Aviaun nian no Armajen Asisténsia Umanitária no Auxíliu Dezastre (HADR) ba Komponente Aérea F-FDTL iha Baucau iha loron 04 Abríl 2025.

Serimónia ne’e marka momentu importante ida iha parseria defeza Estadus Unidus-Timor-Leste, no fasilidade foun hirak ne’e sei hasa’e F-FDTL nia kapasidade resposta ba dezastre no prontidaun operasionál, hodi reforsa Timor-Leste nia reziliénsia no seguransa. Vizita altu nível ne’e reafirma parseria ne’ebé forte no buras entre Estadus Unidus Amérika no Timor-Leste, nune’e reflete kompromisu hamutuk ida ba kooperasaun defeza, estabilidade rejionál, no kolaborasaun ba tempu naruk.

Biografia  Jenerál Steven S. Nordhaus

Jenerál Steven S. Nordhaus nu’udár Xefe da-30 Gabinete Guarda Nasionál nian no nu’udár membru ida hosi Xefe Estadu-Maiór Konjuntu.

Iha kapasidade ida-ne’e, nia serbí hanesan asesór militár ba Prezidente Estadus Unidus Amérika, Ministru Defeza, Konsellu Seguransa Nasionál no hanesan kanál komunikasaun ofisiál Ministériu Defeza nian ba Governadór sira no Adjuntu Jenerál Estadu sira kona-ba asuntus hotuhotu relasiona ho Guarda Nasionál.

Nia maka responsável atu asegura katak membrus 430,000 resin hosi Ezérsitu no Forsa Aérea Guarda Nasionál nian iha dunik kapasidade no prontu atu proteje nasaun no fornese ba Ezérsitu no Forsa Aérea rekursu hirak-ne’ebé prontu hodi uza ba kombate.

Jenerál Nordhaus graduadu hosi Akademia Forsa Aérea Estadus Unidus Amérika nian iha tinan 1989 ho Lisensiatura iha Siénsia Enjeñaria.

Nia lori ona aviaun funu iha misaun kombate nian iha operasoens Southern Watch, Vigilant Warrior, Northern Watch, Iraqi Freedom no Enduring Freedom.

Molok sai Xefe Guarda Nasionál iha loron 02 fulan-Outubru 2024, Jenerál Nordhaus antes ne’e hala’o kna’ar nu’udár Komandante Rejiaun Komandu Defeza Aeroespasiál Kontinentál Amérika Norte hosi Estadus Unidus Amérika nian; Komandante, 1a Forsa Aérea (EUA nia Forsa Aérea Norte no EUA nia Forsa Aérea Espasiál), iha Baze Forsa Aérea Tyndall, Florida.Commander, Continental U.S. North American Aerospace Defense Command Region; Commander, 1st Air Force (U.S. Air Forces Northern and U.S. Air Forces Space), Tyndall Air Force Base, Florida.

Jornalista: Elio dos Santos da Costa