Hatutan.com, (22 Abríl 2025), Díli– Sarani Katoliká Timor-Leste, Tersa loraik (22/04/2025), iha Igreja Katedrál Díli, selebra eukaristia ba Maktoban Papa Francisco hodi hanoin hikas São Pedro nia saseluk ne’e.

Lee Mós: Dom Virgílio Partisipa Funebre Papa Francisco no Hola Parte iha Konklave

Sarani sira iha Díli reza ba Maktoban Papa Francisco iha Tasi-tolu hanesan fatin ne’ebé Papa Francisco prezide misa bainhira nia vizita Timor-Leste iha loron 09 to’o loron 11 fulan-Setembru 2024. Foto/Elio dos Santos da Costa

Papa Francisco hakotu iis iha Segunda-Feira, 21 fulan-Abríl tinan 2025, tuku 07:35 oras Italia. Bainhira notísia ne’e to’o iha Timoroan sira-nia futar tilun, espontaniamente sira ida-idak hasa’e orasaun ba Maromak, liu hosi ida-idak nia aktu. Balun ba sunu-lilin no reza iha fatin Papa Francisco selebra misa bainhira vizita Timor-Leste iha Tasi-Tolu, balun fali halo prosisaun no balun sunu-lilin no reza iha Jardin Nossa Senora  Lecidere.

Padre Paulos Maia ne’ebé prezide selebrasun eukaristia ne’e hateten, Amu-Papa Francisco molok nia mate, iha tinan kotuk nia lansa ona livru ida ho titulu “esperansa” husi nia livru ida-ne’e nia foti konkluzaun ida, nia halo previzaun ida kona-bá nia moris, iha livru ne’e iha konkluzaun ida no rekomendasaun ida husi konkluzasaun ida-ne’e nia dehan mate la’ós rohan ka ikus husi ema nia moris, maibé mate ne’e pasu foun ida bá ema ida atu hahú nia moris.

“Iha livru ne’e nia rekomenda ha’u mate karik hakoi ha’u ho dignu, maibé hakoi hanesan sarani baibain ida,” Padre Paulos Maia haktuir.

Nia dehan sarani doben sira Amu-Papa nia prezensa iha Timor-Leste, iha loron 09 to’o loron 11 fulan-Setembru 2024, seidauk lakon husi  Timoroan sira ninian memoria no Timoroan sira-nia sentimentu.

Amu-Papa Francisco ema hanaran nia Papa povu nian, tanba nia serntimentu umanu ne’e bé kle’an tebe-tebes ho nia maluk sira tanba razaun ida-ne’e mak nia foti naran Papa nian ne’e Francisco, ne’e reflete bá Santu Francisco Asís nia moris, ema ne’ebé riku halo aan ki’ak hodi hadomi ema ki’ak sira no hadomi natureza.

Selebrasaun Eukaristia ba Maktoban Papa Francisco iha Igreja Katedrál Díli, Tersa (22/04/2025). Foto/Zita Menezes

Nia hateten Amu-Papa Francisco hasai nia ezotasan sira ne’ebé koñesidu ho naran Laudato si’, no mós ida seluk mak fratelituti,  no liuhusi selebrasaun misa eukaristia iha Tasi-tolu, tempu ne’ebá,

Amu-Papa Francisco fó hanoin fila-fali Timoroan sira tenke hakle’an liután nia fiar, tanba Timor maiória ne’e fiar Katolikú, maské  maiória Katóliku maibé Amu-Papa nafatin rekomenda atu fortifiká fiar, haboot ka hakle’an  fiar no  atensaun bazeia bá figura  Timor nian kona-bá lafaek.

“Amu-Papa husu ita atu kuidadu ho lafaek, Amu-Papa dehan lafaek bele han buat hotu-hotu, bele estraga buat hotu, estraga ita Timoroan nia fiar, Timoroan nia kultura, estraga Timoroan nia unidade,” Padre  Paulos Maia fundamenta.

Jornalista Estajiária: Zita Menezes