Hatutan.com, (23 Abríl 2025), Lautem – Conselho  de Imprensa  de  Timor-Leste (CI), Fasilita formasaun jornalizmu ambientál  ba jornalista sira hodi hasa’e koñesimentu jornalista sira nian kona-bá oinsá atu hala’o kobertura ba área ambientál ho di’ak no kompriensivu.

Lee Mós: Conselho de Imprénsa Preokupa Remunerasaun bá Jornalista Sira, Hatutan.com Bele Sai Ezemplu

Conselho de Imprensa de Timor-Leste (CI), fasilita formasaun jornalizmu ambientál ba jornalista sira iha Munisípiu Lautem, Kuarta (23/04/2025). Foto/CI

Formasaun ne’ebé konsentra iha Munisípiu Lautem ne’e ho nia topiku  Jornalismu Ambientál forte, natureza protejidu. “Atividade ida ne’e asaun estrátejiku ida Conselho lmprensa hala’o ho objetivu principal rua, primeiro atu hametin kopetensia profisionál Jornalista nian, oinsá kontribui ba objetivu jerál ne’ebé Conselho lmprensa iha, segundu oinsá atu garante indenpendensia jornalismu iha kada redasaun media ida-idak nian,” Diretór Diresaun Análize Dezemvolvimentu  Média (DADM) Conselho de Imprensa, Alberico da Costa Junior hateten hafoin hato’o nia deskursu iha formasaun ambiental ne’ebé realiza iha salaun Otél Roberto Carlos, Lautem

Diretór DADM ne’e informa, treinamentu ne’e hala’o atu atinji mós objetivu jerál ne’ebé Conselho de lmprensa ninia planu asaun, prinsipal lolós ba jornalista ambiental.

“Ita nia jornalizmu ne’e mai ho paradigma ida foun oinsá ita responde ho efetivu barak liu ita nia notísia mai ho ekonomia barak liu politikú, liga barak liu ho sosiadade no krime mais asuntu ambintal ne’e presija paradigma ba Jornalismu ida foun tanba ne’e mak ita bolu Jornalizmu Ambiental,” Alberico Junior esplika.

Biban ne’e Diretór Ezekutivu Conselho de lmprensa, António Dias, hateten teoria fó hanoin katak atu estraga ambiente ne’e lalais, mais atu rekupara ne’e difisil presija jerasaun.

“Jerasaun agora ne’e mak ita-bo’ot sira tenke salva jerasaun sira tuir mai, tanba ne’e mak importante jornalizmu ambiente. Ita hatene katak Lospalos sai hansan Parke Timor-Leste nian (Parke Nino Konis Santana), tanba ita sei iha ai-laran tuan barak ne’ebé kontribui ba ita nia jerasaun sira tuir mai,” António Dias hateten.

Formasaun ne’e hala’o durante loron tolu;  hahú iha loron  23 to’o loron  25 fulan-Abríl 2025.  Jornalista sira ne’ebé partisipa  formasaun ne’e mai husi órgaun komunikasaun sosiál ualu (8), mak hanesan, Lafaek News, Média Mudansa, Stl News, Neon Metin, Timor Post, Radiu Komunidade Lauten ho mós Hatutan.com

Jornalista: Tome da Silva