Hatutan.com, (21 Maiu 2025), Díli—Trajédia Postu Administrativu Cailaco, Munisípiu Bobonaro, 20 Maiu 2025, ne’ebé rezulta joven Ronaldinho da Costa Ximenes lakon vida, sei iha investigasaun nia laran no parte Polísia Nasionál Timor-Leste (PNTL) hein rezultadu autópsia.

Ronaldinho Ximenes monu iha lokál akonteismentu iha Postu Administrativu Cailaco, Munisípiu Bobonaro, 20 Maiu 2025. Foto/Repro Facebook

Oras ne’e daudaun, mate-isin Ronaldinho Ximenes transporta ona mai iha Mortuary Ospitál Nasionál Guido Valadares (HNGV) hodi submete ba autopsia.

Trajédia Cailaco akontese iha ámbitu serimónia hasa’e bandeira  hodi komemora loron restaurasaun independénsia ba dala-23 (20 Maiu 2002-2025), iha ne’ebé deskonfia grupu arte-marsiál rua atake malu no tuda-malu tama to’o fatin serimónia hasa’e bandeira iha Kampu Futeból Postu Administrativu Cailaco.    

Kronolojia ne’ebé relata husi Komandu Polísia Nasional Timor-Leste (PNTL) liuhosi konferénsia imprensa, Kuarta (21/05/2025), katak kazu ne’e akontese hale’u tuku  11:00 dadeer oras Timor-Leste bainhira serimonia hasa’e Bandeira iha Administrasaun Postu Cailaco la’o hela.

Porta vós Komandu PNTL Superintendente Polísia João Belo dos Reis hateten informasaun ne’ebe parte Polísia hetan mós katak, joven sira ne’e mai husi Grupu Arte-Marsiál (GAM) rua ne’ebe molok ne’e iha Segunda kalan (19/05/2925) provoka malu to’o atu asalta malu.

Iha atake malu iha ámbitu komemorasaun loron restaurasaun independénsia iha Postu Cailaco rezulta joven Ronaldinho da Costa Ximenes hetan kanek grave no bainhira halo evakuasaun  ba Ospital la konsege salva nia vida.

Informasaun ne’ebe viral katak Ronaldinho da Costa Ximenes mate ne’e kauza husi kilat musan ka kauza husi membru PNTL mak tiru, Superintendente Polísia João Belo dos Reis, konforma katak  rezultadu autopsia maka bele hatene, mate ne’e mate ho kilat musan ka sasan kroat seluk.

“Karik tanba ema ruma maka oho ho sasan kroat, ne’e mós investigasaun sei la’o no ema ne’e tenke responsabiliza ba atuasaun ne’ebé nia halo. Relatoriu ami simu ona, maibé ami hateten iha ne’e katak buat hotu-hotu investigasaun maka sei termina bazea ba deklarasaun husi sasin sira, ema sira ne’e haree, rona, maka ita bele aprezenta ba Tribunál,” Superintendente Polísia João Belo dos Reis hateten.

Informasaun ne’ebé sirkula, membru Polísia na’in-rua mak tiru, maibé relatóriu ne’ebé Komandu Jerál PNTL simu katak membru PNTL na’i- rua ne’e tiru teu, mézmu ne’e, Komandu PNTL deklara investigasaun sei determina.

Hosi sorin seluk, informasaun ne’ebé Hatutan.com sita husi pájina Facebook PNTL nian katak Komandu Unidade Espesiál Polísia (UEP) destakadu iha Munisípiu Bobonaro liuhosi  Batallaun Maunetensaun Orden Pubulika (BMOP)- COP Delta no Postu F-FDTL Maliana halo operasaun konjunta asegura joven hirak ne’ebé entrega aan ba Eskuadra Polísia Cailaco, hafoin envolve iha konfrontu tuda malu ne’e.

Médiku sira La Hetan Objetu Ruma iha Ronaldinho Nia Isin

Informasaun seluk ne’ebé Dotór Anaténsia no Xefe Sala Operasaun Ospital Referral Maliana, Francisco Amaral da Costa, informa ba jornalista sira katak durante prosesu operasaun ba Ronaldinho Mota Ximenes nia isin mate husi médiku espesialista sirurjia no ortopedia iha Ospitál Referrál Maliana,  Tersa  (20/05/2025), la hetan objetu ruma iha matebian nia isin.

Xefe Sala Operasaun Ospitál Referrál Maliana, Francisco Amaral da Costa, hateten pasiente husik iis  hale’u tuku 14:10 Otl bainhira dotór  espesialista sirurjia no ortopedia halo hela operasaun.

Francisco Amaral da Costa  konta katak bainhira halo operasaun, médiku espesialista  hatama liman diretamente ba matebian nia fuan la funsiona ona.

“Durante ami opera ne’e, ami la hetan buat ida. Ami hatene mak ida ko’ak ne’e de’it, tan ne’e lori bá autopsia atu bele hatene sasán kro’at ruma mak kona ka bala musan mak kona,” Francisco Amaral da Costa tenik.

Xefe Ekipa Operasaun Francisco Amaral da Costa hateten, pasiente mai ho kondisaun kanek ka ko’ak-boot iha hirus-matan, pulmaun rahun no raan sai barak.

Jornalista: Elio dos Santos da Costa