Hatutan.com, (22 Maiu 2025), Díli- Primeiru-Ministru Kay Rala Xanana Gusmão, ho hirus hateten Governu sei hola medida rigor atu taka total  grupu arte-marsiál iha Timor-Leste.

Lee Mós: Trajédia Cailaco, Mate-Isin Ronaldinho Ximenes Submete Bá Autópsia iha HNGV

PM Xanana Gusmão ho hirus no la kontente ho akontesimentu ne’ebé envolve grupu arte-marsiál iha Postu Administrativu Cailaco, Munisípiu Bobonaro iha ámbitu serimonia selebrasaun loron restaurasaun independensia ba dala-23, 20 Maiu 2025. Foto/Elio dos Santos da Costa

Hafoin hasoru malu ho Prezidente Repúblika, José Ramos-Horta iha Palásiu Prezidensiál, Kinta (22/05/2025), Xanana  hateten, Governu sei toma pozisaun ida hodi taka tiha arte-marsiál tanba estraga bei-beik joven sira.

Konfrontu entre  membru grupu arte-marsiál  iha Postu Administrativu Cailaco, Munisípiu Bobonaro, akontese iha ámbitu selebrasaun loron restaurasaun independensia ba dala-23 iha loron 20 fulan-Maiu 2025.

Akontesimentu ne’e rezulta Ronaldinho da Costa Ximenes lakon vida no dadaun ne’e  mate isin submete ona ba prosesu autópsia iha Ospitál Nasionál Guido Valadares (HNGV).

Xanana Gusmão afirma  Govenu ho Prezidenti Repúblika kontente tanba iha selebrasaun bá loron restaurasaun indepedénsia bá dala-23 buat hotu la’o di’ak, apezar iha violénsia uituan iha fatin balu.

“Haree bá haree mai afinál problema ne’e arte-marsiál nafatin, ne’ebé ha’u informa bá Prezidenti Repúblika katák, Governu sei toma posizaun ida para taka tiha arte-marisiál ne’ebé estraga nafatin labarik sira,” Xanana Gusmão, bá jornalista sira hafoin halo enkontru semanál ho Prezidenti Repúblika José Ramos-Horta.

PM Xanana apresia tebes bá komunidade tomak ne’ebé durante loron lima no kalan lima bá iha portu Díli  ne’ebá ho instabilidade ne’ebé kapaas tebes, ema la book malu la estraga malu.

Durante loron lima no kalan-lima Governu organiza eventu espozisaun nasional no konsertu muzikal iha Portu Díli hodi anima populasaun sira  festeza loron restaurasaun independensia Timor-Leste nian.

Iha enkontru semanál ne’e Xefe Estadu ho  Xefe Governu ko’alia  mós problema dezempregu, ne’ebé Primeiru-Ministru infroma bá Prezidenti Repúblika katák iha hanoin no iha planu atu buka oinsá mak bele dudu setór ekonomiká, mais joven sira agora iha de’it telefone nune’e labarik kiik sira seidauk hatene lee mós kaer de’it telefone.

“Susar tebes laiha ida  hakarak servisu hakarak futuru kaer komputador ho laptop de’it, ne’ebé problema boot mak ida-ne’e duni, mais ita haree took sei buka solusaun, atu tau hanoin bá populasaun katák liuliu jerasaun foun, lalika buka de’it servisu laptop  no komputadór, maibé buka hanoin haree nusa mak bele partisipa iha dezemvolvimentu ne’e ho empregu rasik,”  Xanana tenik.

Jornalista Estajiária : Zita Menezes