Hatutan.com, (26 Maiu 2025), Díli–Prezidente Repúblika, José Ramos-Horta, fó indultu ba Timor Oan  na’in-neen nu’udar aktu kleménsia umanitária no unidade nasionál.

Tuir Dekretu Prezidente Republika Númeru 45/2025, asina husi Prezidente Ramos-Horta iha Palásiu Prezidensiál Nicolau Lobato iha Díli no publika iha Jornál Repúblika iha loron 26 fulan-Maiu 2025, revela sidadaun sira ne’ebé hetan indultu ne’e mak hanesan:

• Honoria Pereira Lopes
• Norberto Barreto João
• Maria Goreti Abi
• Maria Scolastica Sona
• Julieta Godinho do Nascimento
• Armanda Jesus das Neves

Dekretu Prezidente Repúblika nian kona-bá komutasaun indultu. Foto/Repro

Komunikadu imprensa ne’ebé Hatutan.com asesu haktuir afirmasaun Prezidente Repúblika, José Ramos-Horta nian dehan indultu hirak-ne’e reflete Timor-Leste  nia kompromisu ba justisa ho mizerikórdia no Timor oan nia fiar ba ema hotu-hotu nia dignidade fundamental.

“Maski ita tenke tane aas estadu direitu, ita mós tenke rekoñese katak justisa loloos dalaruma presiza aktu klemensia ne’ebé serve ba objetivu umanitáriu no promove reintegrasaun sosiál. Desizaun hirak-ne’e hametin espíritu unidade nasionál ne’ebé tenke orienta ita bainhira ita harii futuru ida-ne’ebé prosperu liu ba povu Timor-Leste tomak,” José Ramos-Horta hateten.

Desizaun ne’e reflete konsiderasaun kuidadozu ba ema ida-idak nia sirkunstánsia pesoál, umanu, família, no sosiál, no mós sira-nia potensial ba reintegrasaun sosiál. Perdaun prezidensál sira-ne’e konstitui intervensaun polítika no umanitária iha administrasaun justisa, hodi permite aktu ekuidade individuál tuir lei konstitusionál.

Jornalista: Lazaro Pereira Quefi