Hatutan.com, (26 Juñu 2025), Díli– Ministru  Transporte no Telekomunikasaun (MTK), Miguel Marques Gonçalves Manetelu, Kuarta (25/06/2025),  aprezenta inkluzaun dijitál no infraestrutura  Timor-Leste nian iha   Forum Transformasaun Dijitál Ázia-Pasífiku nian ne’ebé hala’o iha Manila-Filipina.

Lee Mós: MTK Prioritiza Instalasaun Kabu Submarinu ho Konstrusaun Aeroportu Prezidente Nicolau Lobato iha 2025

Ministru Transporte no Telekomunikasaun (MTK), Miguel Marques Gonçalves Manetelu partisipa iha sorumutuk ofisial Nivel aas sira Forum Transformasaun Dijitál Ázia-Pasífiku iha Manila-Filipina. Foto/Mídia MTK

Sorumutuk ofisial Nivel aas sira Forum Transformasaun Dijitál Ázia-Pasífiku ne’e organiza hosi Bánku Dezenvolvimentu Aziatiku  (ADB) iha Manila-Filipina.

Ministru   Miguel Marques Gonçalves Manetelu  iha okaziaun ne’e  ko’alia kona-bá tópiku rua ne’ebé iha ligasaun no importante tebes, hanesan inkluzaun dijitál no infraestrutura ida-ne’ebé iha ekilíbriu, no papél crosscutting bá Infraestrutura Públika dijitál (PDI).

“Bá Timor-Leste, inkluzaun dijitál la’ós luxu,  ne’e nesesidade ida. Ida-ne’e hanesan meiu ida atu fó kbiit bá  ita-nia sidadaun sira, hamenus dezigualdade, no dudu kreximentu sustentavel no inkluzivu. Maibé, atu hetan ida-ne’e, ita tenke enfrenta uluk dezafiu fundamentál sira ne’ebé relasiona ho infraestrutura, asesibilidade no literasia dijitál,” Ministru Transporte no Komunikasaun,  Miguel Marques Gonçalves Manetelu hateten.

Sita husi pájina ofisial MTK nian haktuir governante ne’e ho nia delegasaun   kontente tebes atu ko’alia  kona-bá Sistema Kabu Submariñu Sul Timor-Leste (TLSSC), investimentu públiku signifikativu dahuluk iha infraestrutura dijitál krítiku sira iha Timor-Leste,  lansa iha tinan 2024 nia klaran, projetu ne’e agora dadaun iha ligasaun no prepara hela nia operasaun no sei prontu atu servisu lakleur tan.

Sistema Kabel Submariñu Sul Timor-Leste (TLSSC),  tuir Ministru Miguel Manetelu sei hadia liután konetividade, fornese fundasaun ida bá inovasaun dijitál, no hametin integrasaun Timor-Leste nian, iha ekosistema dijitál ASEAN nian ne’ebé luan liu.

 Timor-Leste  hakarak aprende hosi esperiénsia rejionál no globál hodi dezenvolve enkuadramentu ida-ne’ebé seguru, interoperavel no inkluzivu, no mós salvaguarda privasidade no protesaun dadus.

“Mai ita asegura katak la iha ema ida mak husik hela iha kotuk bainhira ita harii ponte dijitál sira iha abán  ponte sira ne’ebé liga la’ós de’it bá teknolojia, maibé bá ema, komunidade no nasaun sira,”  nia hateten.

Durante estadia iha Manila-Filipina, Ministru Transporta  no Komunikasaun, Miguel Manetelu ho nia delegasaun  sei   hala’o ekontru bilateral  ho Bánku Dezemvolvimentu Aziatiku (ADB-sigla inglés) hodi ko’alia kona-bá setór transporte públiku no aéreu nian, ko’alia kona-bá dezenvolvimentu fasilidade iha transporte públiku nian.

“Ami hato’o ami-nia agradese maka’as bá ekipa ADB sira iha Manila no Dili, inklui mós konsultór no pesoál sira, bá sira-nia apoiu ne’ebé metin hodi halo projetu ne’e bá oin. Ami hein atu rona ADB nia perspetiva kona-bá pasu sira tuir mai no reforsa ami-nia prontu atu mantein momentum no avansa servisu importante ida-ne’e hamutuk,” Miguel Manetelu hateten.

Jornalista: Marcelino Tomae