Hatutan.com, (01 Jullu 2025), Díli–Autoridade Polísia Nasionál Timor-Leste (PNTL) ho ekipa Servisu Migrasaun, Segunda kalan (30/06/2025), hale’u tuku 21:00 Otl, asegura menoridade na’in-neen ne’ebé deskonfia otél balun esplora ba atividade prostituisaun infantíl.

Polísia asegura hela menoridade na’in-neen ne’ebé otél balun iha Dili laran halo esplorasuan seksuál ba sira. Foto/PNTL

“Segunda-kalan, hale’u  tuku 21:00 OTL,  Servisu Informasaun Polísia, Servisu Migrasaun ho Sevisu Investigasaun Kriminál, halo operasaun iha Díli  tanba simu informasaun katak otél balun iha  fasilita prostituisaun infantíl  ka esplorsaun sexuál ba  minoridade.  Ami lokaliza no deteta,  alin minoridade na’in-neen no transporta kedas sira na’in-neen mai iha Kuartel Jerál PNTL  hodi halo identifikasaun, inklui na’in ba otél ho otél nia bainaka balun,” Portavós PNTL, Superintendente  Polísia João Belo dos Reis , informa ba jornalista sira iha Kuartél Jerál PNTL, Caicoli, Tersa (01/07/2025).

Autoridade Polísia mós bolu kedas na’in ba Otel no traballador sira  hamutuk ho bainaka sira ne’ebé ba vizita iha otel, hodi halo indentifikasaun.

Daudaun ne’e autoridade Polísia prepara hela relatoriu auto-notísia atu aprezenta ba Ministeriu Publiku hodi kontinua halo prosesu tuir lei ne’ebé vigora.

Ligadu ho kazu prostituisaun Infantil no pratika esplorasaun seksuál ba minoridade ne’e, Polísia Nasionál Timor-Leste husu ba públiku, liuliu  inan-aman sira tenke sai edukador di’ak no kontrola oan sira-nia movimentu iha oras tama no sai husi uma. Ho nune’e, labarik sira, liuliu labarik feto sira labele sai vitima ba grupu balun ne’ebé ho intensaun la diak hodi halo esplorasaun seksuál ba labarik sira.

Jornalista: Juvinal Cabral dos Santoso