Hatutan.com, (07 Jullu 2025), Díli– Deparatamemtu Forensik, Ospitál Nasionál Guido Valadares (HNGV), seidauk bele halo autópsia ba mate-isin Peregrina da Conceição   tanba hein hela mandadu husi Ministériu Públiku (MP).

Lee Mós: PNTL Detein Ona Suspeitu Oho Peregrina da Conceção Soe iha Jakarta 2

Xefe Deparatamemtu Forensik HNGV, Nilton Tilman. Foto/Juvinal Cabral dos Santos

Xefe Deparatamemtu Forensik HNGV, Nilton Tilman, Segunda (07/07/2025), husu deskulpa ba públiku tanba iha razaun ida ka rua hodi autópsia ba loron rua ka tolu tan tanba kestaun prinsipál balun, liuliu seidauk iha mandadu husi MP inklui aspetu sosiál no kulturál ne’ebé bele implika komplesidade prosesu ida ne’e.

“Hanesan ita hotu no akompaña iha média sosiál ne’ebé mak virál tebe-tebes iha vitima ka mate-isin feto ida populasaun hetan iha fatin Jakarta II iha Ainaro ne’ebá depois sira kontaktu kedas imediatamente autoridade lokál ho Polísia ba haree,”  Xefe Deparatamemtu Forensik, Nilton Tilman informa ba jornalista sira iha nia servisu fatin.

“Haree ba nia sena de krimi ho tan faktus sinais sira ne’ebé mak hetan iha mate-isin ita nia Polísia sira suspeita makás katak iha ligasaun ho kazu krimi ho agresaun fiziku ruma, maibé buat sira ne’e hotu iha hela investigasaun laran, prosesu investigasaun lao makás involve parte kompetente hotu-hotu.”

Diretór hateten membru Forensik hamutuk nain 6 ho tan Polísia sira sufisente los hodi atu halo atende ba  kazu ida ne’e, maibé tenke hatene autopsia ne’e prosesu legál ida prosedimentu sensitivu tebe-tebes tanba sosiedade nia pensamentu dala barak seidauk iha komprensaun ida klaru kona-bá saida mak prosesu autópsia ne’e.

Dadaun ne’e mate-isin tau hela sala autópsia R-13 COLD ROOM, nune’e hein hela mandadu husi Ministeíru Públiku hafoin bele halo autopsia.

Luishino da Silva Soares, reprezentante família matebian. Foto/Juvinal Cabral dos Santos

Iha fatin hanesan reprezetante família matebian, Luishino da Silva Soares haktuir sira-nia alin matebian Peregrina da Conceição  sai husi uma iha Aldeia Caicasaico, Suku Asumanu, Postu-Administrativu Liquiça, laiha koñesimentu husi família.

“Horseik meudia mak akontese mate iha Ainaro Jakarta II ne’e mak família foin hakfodak ema hotu tau nia imajen iha Facebook. Nia sai husi uma dadersan tuku 04:00 Otl, ha’u rasik haree fali nia mate ne’e liuhosi media sosiál Facebook,” Luishino da Silva Soares informa.

Reprezenta família dehan nia la iha problema ruma ho família sira, nia sai husi uma ne’e ferik ho katuas sei toba. Matebian  moris iha tinan 2002 no iha oan ida ho laen divorsiu ka fahe malu ona.

Jornalista: Juvinal Cabral dos Santos