Hatutan.com, (08 Jullu 2025) Díli- Iha fulan-Outubru tinan 2025, Timor-Leste realiza hikas Dili Marathon Internasionál no ba tinan-ne’e, atividade desportiva internasionál ne’e nia tema prinsipál mak  “Run For Palestine”.

Lee Mós: Díli Internasionál Maratona, Atleta Hosi Kenya Primeiru Lugar no Felisberto Terseiru Lugar

Vise-Primeiru Ministru no Ministru Koordenadór Asuntu Ekonomia no Ministru Turizmu no Ambiente, Francisco Kalbuadi Lay akompaña husi Ministru Juventude Arte no Kultura, Nelio Isaac Sarmento no Prezidente Atlentismu Afranio Xavier Amaral, informa atividade Dili Marthon Internasionál ne’ebé sei hala’o iha fulan-Outubru 2025. Foto/Juvinal Cabral dos Santos

Dili Marathon Internasionál, Prezidente Repúblika, José Ramos-Horta inisia no promove dezde nia mandatu iha tinan 2007, maibé prezidente tuir mai Francisco Guterres “Lú Olo”  la kontinua nune’e paradu tiha. Nune’e, iha tinan ne’e, Ramos-Horta kontinua fali atividade desportiva ne’e ne’ebé tuir ajenda sei realiza iha fulan-Outubru.

Bá inisiativa restaura fali atividade Dili Marathon Internasionál ne’e, Xefe Estadu konvida Vise-Primeiru Ministru no Ministru Koordenadór Asuntu Ekonomia no Ministru Turizmu no Ambiente, Francisco Kalbuadi Lay akompaña husi Ministru Juventude Arte no Kultura, Nelio Isaac Sarmento  no Prezidente Atlentismu Afranio Xavier Amaral, hodi informa no halo diskusaun ba  restaurasaun atividade Dili Marathon Internasionál.

“Dili Marathon internasionál nian ida ne’e, ho tema foun, “Run For Palestine” ida ne’e hanesan solidaridade Timor-Leste nian ba Palestina,” Francisco Kalbuadi Lay haktuir ba jornalista sira iha Palásiu Prezidensiál, Tersa (08/07/2025).

Asuntu seluk mós ko’alia kona-bá realizasaun  festivál Rabilau. Nune’e, Vise-Primeiru Ministru no Ministru Koordenadór Asuntu Ekonomia no Ministru Turizmu no Ambiente, Francisco Kalbuadi Lay hato’o agradesimentu boot ba ideia briliante sira Xefe Estadu nian ne’e.

Iha fatin hanesan Ministru Juventude Arte no Kultura, Nelio Isaac Sarento hateten iha fulan-Outubru, tinan  ne’e, sei realiza kompetisaun Dili Internasionál Marathon ne’ebé ninia merkadu ba partisipasaun ne’e ba país sira ASEAN nian inklui atleta nasionál ho internasionál sira hela iha Díli.

Prezidente Atlentismu Afranio Xavier Amaral hatutan Díli Marathon ida ne’e aumenta tan palavra hira iha ne’ebá “Run For Palestine” naran ida previleziu uituan redasaun atletismu sei prepara husi parte teknik, nune’e eventu lao diak no partisipasaun masimu husi atleta ASEAN no atleta nasionál sira.

“Ho apoiu husi Xefe Estadu no  Governu  ba eventu ida-ne’e, ha’u garantia katak sei la’o susesu,” Afranio Xavier Amaral hateten.

Jornalista: Juvinal Cabral dos Santos