Hatutan.com, (12 Jullu 2025), Díli- Ministru Negósiu Estranjeiru no Kooperasaun (MNEK), Bendito dos Santos Freitas, partisipa hanesan observadór iha enkontru Ázia Rejionál Fórum (ARF) bá dala-XXXII ne’ebé diskute kona-bá seguransa globál no kombate krime sibernétika.

Lee Mós: Timor-Leste Nia Adezaun Formal Ba ASEAN Marka Ona Ba Loron 26 fulan-Outubru 2025

Enkontru Ázia Rejionál Fórum (ARF) bá dala-XXXII iha Kuala Lumpur, Sesta (11/07/2025) Foto/Mídia MNEK

Komunikadu imprensa ne’ebé Hatutan.com asesu husi Gabinete Média MNEK,  Sábadu (12/07/2025), informa enkontru ARF ne’ebé hala’o iha Kuala Lumpur. Málazia,  partisipa husi Ministru Negósiu Estranjeiru hanesan Amérika, Xina, Rúsia, Kanadá, Japaun, Austrália, Korea do Súl, Nova Zelándia, Índia no nasaun membru ASEAN nian sira hodi diskute situasaun iha rejiaun no mundu.

Asuntu prinsipál ne’ebé ko’alia iha ARF mak kona-ba dezafiu globál, seguransa, krime sibernétika, seguransa marítima no mós dezenvolvimentu sustentável, inklui mós kestaun denuklearizasaun, kazu Myanmar, South China Sea no seluk tan.

“Sesaun ida importante tebes mak ARF ne’ebé ho líder sira East ASEAN Summit nia ministru sira mós iha no mós ministru sira ASEAN nian hotu-hotu iha ne’ebá ko’alia asuntu global ne’ebé importante tebetebes, liu-liu kona-ba dezafiu globais, seguransa, krime sibernétika, seguransa marítima no mós dezenvolvimentu sustentável,” Ministru Bendito Freitas hateten.

Ho partisipasaun iha ARF ne’e, Timor-Leste bele aprende no mós fahe Timor-Leste nia esperiénsia kona-ba defende prinsípiu universal ligadu hanesan direitus umanus, justisa, liberdade no independénsia sira-nian iha luta ba hametin páz no seguransa mundiál.

“Pozisaun Timor-Leste nian mak ita kontinua defende prinsípiu universál kona-ba direitus umanus, justisa, kona-ba direitu ema nian bá liberdade no independénsia iha estadu direitu bainhira sira iha espresaun kona-ba ida-ne’e liu-liu luta bá páz no seguransa global,” Bendito Freitas hateten.

Durante enkontru ARF, nasaun lubuk ida mak apresia no agradese bá Timor-Leste bá apoiu ne’ebé fó iha nível multilateralizmu liu husi votu a-favór bá rezolusaun sira iha Konsellu Seguransa Nasoins Unidas.

Jornalista: Zita Menezes