Hatutan.com, (15 Agostu 2025), Díli- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, triste no preokupa ho esperiénsia  ne’ebé akontese ba veteranu ka soldadu F-FDTL balu tenke lakon vida bainhira sira ba halo tratamentu iha fasilidade saúde sira iha Timor-Leste.

Lee Mós: Governu Sei Halo Pagamentu Bá Veteranu Ne’ebé Laiha Reklamasaun

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’. Foto/Dok

Tenente Jenerál Falur Rate Laek hateten veteranu ativu ka soldadu F-FDTL sira moras atu mate lori ba ospitál, ikus mai pesoál saúde  sira foti liman dehan  lori fali ba uma. Ho esperiénsia ne’e, , Tenente Jenerál Falur Rate Laek propoin atu estabelese klínika veteranu iha Instituisaun F-FDTL.

Liuhosi programa Meet The Press ba edisaun IX ho tópiku “Tinan 50 FALINTIL- FDTL iha prosesu libertasaun nasionál no konstrusaun estadu”,  Sesta (15/08/2025), Falur Rate Laek deklara nia hakarak  luta ba klínika veteranu sira iha instituisaun F-FDTL  halo kazerna ida para apoiu sosiál tula veteranu sira moras, mai mak tau iha ne’ebá kuandu mate mak família lori ba halo serimónia funerál.

Falur Rate Laek esplika asisténsia ba veteranu sira  no sira nia oan agora, kuandu ko’alia kona-ba ida ne’e nia tenke agradese ba primeiru Governu to’o mai nonu Governu tanba esforsu sira halo lei para rekoñese veteranu no halo lei para fó subsídiu nune’e iha serimónia ofisial sira, nia fó onra ba governu hotu.

“Ha’u mós hatene katak iha Konsellu Veteranu ida, sai hanesan porta-voz ba iha asuntu veteranu hotu agora sira halo la di’ak, ka di’ak ne’e ita-boot sira mak hatene ba halo avaliasaun. Ha’u foin daudauk ha’u luta iha instituisaun F-FDTL nia laran ha’u nia soldadu veteranu ativu sira moras atu mate, agora doutór foti liman dehan atu lori fali ba uma, ha’u preokupa lori ba uma ne’e se mak atu ba halo asisténsia ba sira, nia oan mak ba hein sei lakon nia karreira eskola, nia fen ha’u katuas tiha mak hola feto ne’e, feto ne’ebé mak hatuur nia fasilita nia labele, entaun ha’u  deside nia hela ospitál  ba veteranu nune’e sira moras bele ba hala’o tratamentu no baixa to’o mate mak tula sai,” Falur Rate Laek hateten.

Daudaun ne’e Falur Rate Laek luta ba klínika iha  F-FDTL halo kazerna ida para apoiu sosiál tula veteranu sira moras mai mak tau iha ne’ebá, kuandu mate mak família lori ba, ne’e mak nia esforsu ba veteranu sira.

“Agora iha FDTL ne’e  veteranu no martir balun dehan hanesan ne’e maun ami nia oan ida rekomenda, ha’u nia problema ne’e ha’u la iha moral para atu rekomenda ne’e. Vítima ho veteranu ne’e antigu kombatente iha Timor ne’e la’ós uitoan de’it, vaga servisu F-FDTL nia, ita husu servisu  600 ka 1000-resin  agora mai kompete rihun 30 to’o rihun 40 ne’e  ha’u pasa fali ba o liu. Depois sira seluk la iha, maluk balun insulta ha’u dehan ami nia maun mate ona ne’ebé agora la haree, o moris ha’u ajuda o di’ak entaun sira mate ne’e ha’u la ajuda nia inan-aman nia klamar dehan saida ba ha’u,” Falur afirma tan.

Xefe Estadu Maiór Jenerál F-FDTL Tenente Jenerál  Falur Rate Laek, afirma vaga ne’ebé estadu loke hanesan F-FDTL no Polísia Nasional Timor-Leste (PNTL)  nia konsidera sidadaun, tanba iha 30 Agostu mai ne’e  sidadaun Timor nian nune’e la iha ema ida liu husi rekomendasaun.

“O ajuda nia, entaun ema ida  ajuda ita, nia ema tur iha kampu ne’ebá ne’e la ba. Ne’ebé ha’u nia morál la fó tuir irmaun, mais ha’u hakarak agradese ba Governu halo ona ita nia hanoin, ita kontribui hamutuk  para governu hadi’a asuntu veteranu nian,” Falur tenik.

Jornalista: Juvinal Cabral dos Santos