Hatutan.com, (01 Setembru 2025), Díli– Ministru Administrasaun Estatál (MAE), Tomas do Rosario Cabral, Segunda (01/09/2025) fó pose ofisiál ba Prezidente foun Autoridade Munisípiu Dili (PAM-Dili) Francisco dos Santos no mós Paul Moniz Maia nu’udár PAM Bobonaro.

Ministru MAE Tomas do Rosario Cabral fó posse ofisiál ba PAM Dili Francisco dos Santos ho Paul Moniz Maia nu’udár PAM Bobonaro. Foto/Zita Menezes

Ministru Tomas Cabral iha nia diskursu husu PAM-Dili ho PAM-Bobonaro atu haree povu nia moris no programa saida de’it maka  sei sai prioridade bá dezenvolvimentu.

“Prezidente Autoridade Munisípiu tenke duvida ho asuntu sosiál ne’e, povu vulnarevél loloos na’in hira, asuntu sosiál  ita iha liña servisu munisípiu sira, atu trata asuntu sosiál, edukasaun, saúde, agrikultura, jestaun dezastre naturál, jestaun merkadu no turizmu, kompenente sira ne’e maka servisu hamutuk atu haree difikuldade povu nian moris,” Ministru Tomas Cabral afirma.

Nia husu PAM sira atu kontrola programa dezenvolvimentu integradu munisipál no servisu maka’ás bá dijitalizasaun rejistu populasaun, no  akompañia merenda eskolar, no haree problema saúde  sira no ordena diretór servisu sira.

Espesiál ba PAM-Díli, Ministru Administrasaun Estatál husu haree problema lixu, problema jestaun orden públiku, jestaun simiteriu sira no reuniaun mensal.

Iha fatin hanesan, Prezidente Autoridade Munisipíu Díli,  Francisco dos Santos hateten, nia parte sei tau prioridade bá programa haat maka hanesan engarafamentu iha kapitál Díli, inundasaun, dezastre naturál, infraestrutura ekonomia hanesan merkadu no mós problema lixu inklui lei ne’ebé maka atu regula komunidade sira selu koima bainhira soe lixu arbiru.

“Hakarak ka lakohi ha’u sei esforsu bá ida-ne’e para oinsá  atu finaliza ona  lei ida-ne’e para  atu implementa, tanba ita hatene katak ita-nia komunidade sira ne’e, la soe foer sira iha fatin lixeiru, maibé soe fali iha li’ur, nune’e ami husu komunidade iha Díli atu utiliza fatin lixu sira ho di’ak,” PAM Díli Francisco dos Santos afirma.

Prezidente  Autoridade Minisípiu Bobobnaro (PAM) Paul Moniz Maia, hateten, nia sei kontinua servisu ne’ebé maka iha ona no sei tau prioridade bá infraestrutura baziká hanesan estrada no agrikultura.

“Bobonaro, ita hotu hatene katak área poténsia ba agrikulutra nian, ne’ebé ha’u sei enkoraja motivasaun ida ké di’ak bá ha’u nian komunidade sira iha Bobonaro para servisu makaas liután iha area agrikultura nian, maibé antes agrikultura la’o di’ak tenke iha infraestrutura estrada tenke  di’ak,” PAM Bobonaro Paul Moniz Maia. hateten

Prezidente Autoridade Munisípiu Díli (PAM) Francisco dos Santos troka eis PAM Díli Gregório Saldanha, no mós Prezidente Autoridade Minisípiu Bobonaro foun Paul Moniz Maia  troka eis PAM Bobonaro  Alexandrino Pires.

Jornalista : Zita Menezes