Hatutan.com, (05 Setembru 2025), Díli– Komisaun G Parlamentu Nasionál ne’ebé trata asuntu Edukasaun, Joventude Kultura no Sidadania, sei bolu Ministru Joventude, Desportu Arte no Kultura (MJDAK), Nelio Isaac Sarmento, atu klarifikadezentendimentu MJDAK ho Federasaun Futeból (FFTL) kona-bá preparasaun infraesturtura futeból, liuliu relativa ho reabilitasaun Estádiu Munisipál Dili  no konstrusaun kampu futsal indoor tuir padraun internasionál iha Tasi-tolu.

Lee Mós: Reabilitasaun Estádiu Munisipál Díli, PM Xanana: Konsellu Ministru Aprova Tiha Ona Proposta FFTL

Membru Komisaun G-PN Deputadu Mateus da Cruz de Carvalho. Foto/Zita Menezes

Membru Komisaun G Deputadu Mateus da Cruz de Carvalho, hateten tenke buka solusaun ida para rezolve situasaun konflitu entre MJDAK ho FFTL no mós prosesu konstrusaun foun bá estádiu funtsal indoor tuiur padraun internasionál iha Tasi-tolu ne’ebé aprová tiha ona husi Konsellu Ministru.

“Ita hatene katak tinan barak nian laran joventude parte deportu liuliu iha área futeból, ita nian kampu ne’ebé iha la tuir padraun  FIFA atu  ita utiliza ba jogu internasionál, tanba ne’e  ha’u hanoin importante tebes estádiu ho padraun internasionál ida bele fasilita jogu intenasionál iha ita nian rai, tanba desportu ne’e agora tama iha industria ona, sé ita laiha estádiu, ita aluga ema nian estádiu  retornu bá fali fatin seluk,”  Deputadu Mateus da Cruz de Carvalho  informa bá jornalista sira iha Parlamentu Nasionál, Sesta (05/09/2025).

Membru PN husi Bankada CNRT ne’e husu  Governu, liuliu Ministériu Joventude Desportu Arte no Kultura (MJDAK) ho Fedarasaun Futeból Timor-Leste (FFTL) tenke haree situsaun ida-ne’e tanba importante loos atu Timor-Leste iha estádiu ho padraun internasionál.

“Ha’u hanoin katak konflitu interese sira ne’e remata no tau bá kotuk, haree interese nasionál, ida-ne’e maka importante tebes interese nasionál maka tenke tau bá oin. Labele iha interese konflitu entre  MJDAK  ho FFTL,” Deputadu Mateus Carvalho hateten.

Nia  afirma  sé Timor-Leste  halo estádiu padraun internasionál bele iha kapasidade kadeira to’o 30,000, depois tiket ida faan $5.00 ne’e bele hetan retornu boot bá jogu ida. Nune’e, nia husu MJDAK ho FFTL  tenke tuur hamutuk buka solusaun.

Primeiru-Ministru Kay Rala Xanana Gusmão rasik  fó ona orietasaun para prosesu harii estádiu tuir padraun internasionál iha Tasi-Tolu ne’e bele la’o no MJDAK tenke obedese bá desizaun ne’ebé  Konsellu Ministru aprová ona.

Deputadu ne’e informa  katak MJDAK la fó autorizasaun FFTL atu utiliza kampu sira hanesan iha estádiu  Munisipál Díli, tanba ho razaun kampu ne’e sei iha prosesu reabilitasaun.

“Sé kampu futeból sira iha Munisípiu ne’e la autoriza tanba saida, ita bele hateten estádiu Díli iha prosesu reabilitasaun depois jogu CPLP, ne’e ita komprende laiha problema. Maibé sé munisipíu barak-barak ne’ebé estádiu futeból hanesan Manatuto husu atu uza, maibé  la fó  autorizasaun ne’e tanba saida, ne’e tenke haree didi’ak, atu husi kampu sira ne’e duut maka moris iha laran, Governu gasta osan bá kampu sira ne’e  para fó autorizasaun bá  federazaun para bele utiliza bá atividade jogu sira,” nia hatutan.

Parlamentu Nasionál agora iha resesu, depois tama fali mai Komisaun G sei bolu Ministru  Joventude Desportu no Arte Kultura (MJDAK), Nelio Isaac Sarmentu depois halo konfirma situasaun ne’e tanba saida.

Jornalista: Zita Menezes