Hatutan.com, (08 Setembru 2025), Díli– Ministru Juventude Desportu Arte no Kultura (MJDAK) Nelio Issac Sarmento, seidauk iha tempu tuur hamutuk ho  Federasaun Futeból Timor-Leste (FFTL) atu  diskute prosesu reabilitasaun Estádiu Munisípál Díli no konstrusaun estádiu unidade nasionál iha Tasi-tolu ne’ebé atu harii tuir padraun internasionál.

Lee Mós: Reabilitasaun Estádiu Munisipál Díli, MJDAK-FFTL Labele “Trava” Malu

Ministru MJDAK no antigu Sekretáriu Jerál FFTL, Nelio Isaac Sarmento. Foto/Dok.Hatutan.com

Ministru Joventude Desportu Arte no Kultura Nelio Issac Sarmento hateten,   konsidera diferensa entre nia parte ho FFTL  la’ós polémika, maibé negósiasaun ho FFTL sei iha prosesu nia laran.

Nelio Isaac Sarmento, antigun Sekrétariu Jerál FFTL tempu Prezidente Francisco Kalbuasdi Lauy nian ne’e hateten ko’alia  kona-bá konstrusaun  estádiu Unidade Nasionál tuir padraun FIFa nian ne’e  ministériu kompetente sira tenke fó parser no análiza tekniku, hanesan Ministériu Planeamentu no Investimentu Estratéjiku (MPIE) ho Ministériu Justisa, tanba prioridade  Estadu nian hola parte iha terrenu konstrusaun Estádiu Unidade Nasionál tuir padraun internasionál ne’ebé propoin husi FFTL no FIFA.

“Daudaun ne’e iha parte Governu sei  iha faze diskusaun, bainhira ami nian hotu ona, maka ami ko’alia negosiasaun ho FFTL , agora ne’e seidauk,  ami seidauk iha tempu hodi  tuur  hamutuk tanba sei  iha prosesu,”  MJDAK Nelio Isaac Sarmento nu’udár elementu prinsipál ida husi kandidatu Francisco Kalbuadi Lay nian ba prezidente FFTL iha kongresu nasionál FFTL nian ba da-hitu tinan 2022 ne’ebé hetan derrota, hateten ba jornalista sira iha Palásiu Governu, Segunda (08/09/2025).

Ministru Nelio Isaac haktuir,  Governu nia pozisaun maka ho ideia  sira ne’ebé mai husi  Federasaun Futeból Timor-Leste, maka oinsá atu tuur haree didi’ak ho  enkuadramentu Legál sira ne’e, maka oinsá  tuur  hamutuk haree lei sira ne’e, atu nune’e, aban-bainrua  la bele prejudika fali tanba MJDAK tenke garantia kontinuidade, katak  sé aban-bainrua   IX Governu sai tiha, Governu ida mai torka   atu halo saída?,  Tanba ne’e  tenke  hatuur didi’ak prosesu ne’e atu nune’e  labele prejudika  iha futuru.

“Agora ho hanoin ida FFTL ne’e, ita mós buka hela,  mais ou menus atu harii Estádiu Olémpiku ne’e,  rai iha ne’ebé, fatin iha ne’ebé, ne’e mós ita tenke estuda hotu, nune’e mós ita halo estadu mós kona-bá  orsamentu  ne’ebé atu uza,  harii Estádiu  de’it, poll iha ne’ebá ne’e nia kustu hira, ita tenke tetu  ho didi’ak  para ita halo investimentu  tenke estratéjiku la bele  hanesan ita gasta osan boot  bá ida-ne’e de’it, depois  ita halo Estádiu Olémpiku nia gasta osan  de’it, ne’e mós ladún di’ak,” nia afirma.

Nia dehan, ida-ne’e hanesan responsabilidade estádu nian no Governu  nian atu haree prosesu sira. Tanba desizaun Konsellu Ministru  ne’e mai ho pakote rua maka harii Estádiu foun ho  reabilitasaun bá estádiu Munisipál Díli,  ne’e pakote ida de’it, la’ós ketak-ketak.

Kona-bá konsellu Ministru, deside ona hodi atribui FFTL atu halo reabilitasaun, tuir nia katak dadaun ne’e maka sei iha faze negósiasaun,  maibé seidauk hotu. Tanba MJDAK sei halo análize   tenke  halo diskusaun simu protestu  sira mai husi Igreja  mai husi Sosiedade sivíl.

“Karik orasida iha buat ruma maka ami sente  hatene, seidauk klaru didi’ak,    Ministériu tolu  ne’ebé maka relevante  sei lori fali  mai iha konsellu Ministru hodi haree ami ninia levantamentu  atu nune’e konsellu Ministru mós bele haree fila fali hanoin seluk,” nia  tenik.

Reabilitasaun estádiu Munisipál Dili no konstrusaun Estádiu Unidade Nasionál iha Tasi-tolu nia orsamentu mai husi FIFA ho montante $3,000,000. 00,  Ministru Nelio Issac konsidera loos, maibé atu harii Estádiu foun, tuir estandar Futeból de’it,  maibé atu haree bá reabilitasaun,  tenke haree mós kustu, reabilitasaun nia kustu boot liu ka konstrusaun Estádiu foun maka kustu boot liu.

Kona-bá preokupasaun Sosiedade sivil, kona-bá  klubu Francisco Kalbuadi Lay, ho  klubu Nilton Telmo Gusmão do Santos, tuir nia katak  la’ós problema lideransa na’in rua ne’e,  maibé  ne’e Governu nia responsabilidade.

“Agora sira nia lideransa di’ak hela ne’e,  ita boot sira  bá kahur fali ida-ne’e, ne’e sosiedade sivíl nia kakutak maka hanesan to,  gosta haree buat ne’ebé ladún razuavel, depois sira  ko’alia  depois ita boot sira halo notísia sai virál, tanba  ne’e atu halo reabilitasaun Estádiu bá atividade jogu Futeból ema hotu nia, maibé dehan fali bá ema ida nia interese, ha’u hanoin,  hanoin se hanesan ne’e la lojíka liu,”  Nelio Isaac afirma.

Tuir nia katak, importante maka atu atividade futeból la’o ka  la la’o, sé atividade Futeból la’o, ne’e  presiza kampu,  sei halo tiha reabilitasaun, foti fali Estádiu iha ne’ebé atu garantia atividade futeból la’o.

“Agora ne’e ita hili  opsaun, ita hakarak reabilitasaun la’o, hodi hapara atividade,  agora ita haree took opsaun,  hili maka atividade maka la’o,  ka hili reabilitasaun hodi hapara atividade futeból  hotu-hotu la la’o,  ne’e mós ladún razaun,”  katak Nelio Issac.

Tanba ne’e tuir nia katak, Governu liuhusi MJDAK nia preokupasaun  maka hakarak  ema hotu-hotu prátika atividade desportu, buka fasilidade  hodi organiza atividade ne’e la’o.

Kona-bá negósiasaun atu reabilitasaun Estádiu Munisípál Díli, tuir  Ministru Nelio Isaac, katak  forma ona ekipa husi MJDAK hodi halo estudu,  tanba prosesu ne’e, la’ós ohin ko’alia aban atividade la’o tiha ona.

“Ita boot sira hanoin katak, ohin ko’alia aban atividade la’o tiha ona, la’ós hanesan  ne’e, iha prosesu ne’e barak,  ita tenke halo levantamentu, levantamentu mós prosesu barak, maka hanesan ita bá sukat rai, média hira, ema hira maka okupa. Iha ne’ebá,cems hira maka  bele atu hasai,” Ministru Nelio Isaac esplika.

Nia dehan, tanba iha mandatu VIII Governu konstitusionál iha hanoin ida mós atu iha kontratu konsesaun, katak  FFTL hakarak aluga, rai iha Estádiu Munisipál  hodi uza  FIFA nia orsamentu hodi  halo reabilitasaun iha ne’ebá, maibé dokumentu seidauk kompletu.

Iha fatin hanesan Ministru Justisa Sérgio da Costa Hornai hateten,  kona-bá rai Tasi-Tolu Ministériu Justisa, hein de’it koordenasaun  husi parte FFTL ho MJDAK.

“Tanba parte Iha Ministériu  Justisa pontu atu kolabora, tanba ami ho MJDAK ko’alia hela atu haree  ida ne’e oinsá mós atu halo atribuisaun bá FFTL,” Ministru Justisa Sérgio da Costa Hornai hateten.

Kona-bá reabilitasaun Estádiu Munisípál Díli, tuir Ministru Sérgio Hornai katak, ne’e kompetensia MJDAK  maka sei ko’alia hamutuk  ho Federasaun Futeból Timor-Leste.

Molok ne’e Federas Timor-Leste (FFTL),  Observador Amante Futeból Timor-Leste liu-husi Diretor Ezekutivu Asia Justice And Rith (AJAR), José Luís de Oliveira hateten konsidera  Ministru Juventude Desportu Arte no Kultura Nelio Isaac Sarmento hatudu dezobidensia bá desizaun Konsellu Ministru  ne’ebé aprova ona hodi atribui  projetu rehabilitasaun bá estadiu Munisípiu Díli.

Observador Amante Futeból Timor-Leste José Luís de Oliveira konsidera, aktu ne’ebé Ministru Nelio Isaac Sarmento   hatudu bá FFTL ne’e, fó prezuizu bá nasaun  Timor-Leste, tanba vantajen  ne’ebé FIFA ho AFC fó osan atu hadia estádiu Munisipál Díli, bele lakon tiha de’it, tanba Governante ne’e la apoiu hodi fasilita estadium ne’e bele  halo rehabilitasaun.

“Primeiru kazu ida-ne’e hatudu momoos dezobidensia  husi Ministru Juventude Desportu Arte no Kultura Nelio Isaac Sarmento bá desizaun Konsellu Ministru. Konsellu Ministru nia desizaun aas, depois hatudu momoos Ministru ne’e  laiha onesidade laiha integridade, momentu diskusaun iha konsellu Ministru nia mós vota hodi apoiu tanba sá maka bainhira atu implementa nia bá Impede fali, ne’e hatudu momoos Ministru ne’e laiha integridade,” José Luís de Oliveira hateten bá Hatutan.com iha nia knaar fatin  iha Faról- Díli, Tersa (26/08/2025).

Nia afirma, hahalok sira ne’e,  presiza kestiona tanbasá maka buat ne’e akontese,  tanba ne’e tuir nia katak, ida-ne’e hatudu katak iha ema balun  ke durante ne’e hetan vantajen ekonómia liuhusi  bá aluga kampu  iha estranjeiru, kuandu bainhira ekipa selesaum nasionál husi Timor-Leste  atu bá joga.

“Tanba ita aluga kampu iha estranjeiru ezemplu foin dadauk sira bá aluga iha Austrália, joga hasoru malu iha ne’ebá,   ne’e ita aluga hasai osan barak,”  nia dehan.

Nia deskonfia situasaun ne’e akontese, tanba pesoal balun iha ne’e hetan  vantajen  ekonómia  liuhusi aluga kampu iha rai li’ur, ne’e presiza  públiku tenke kestiona, tanba ne’e Koorupsaun. No aktu Ministru  Nelio Isaac Sarmento halo ne’e, tanba hahú  kedas iha kongresu, hamosu konflitu entre grupu Francisco Kalbuadi Lay ho grupu Nilton Telmo Gusmão dos Santos ninia.

Jornslista: Marcelino Tomae