Hatutan.com, (09 Setembru 2025), Díli- Parlamentu Nasionál liuhosi Xefe Bankada PD, Manuel Noronha, husu ba Ministériu Obra Públiku (MOP), atu implementa lalais projetu reabilitasaun estrada iha Munisípiu Ermera hodi bele fasilita movimentu komunidade sira.

Xefe Bankada PD, Manuel Noronha. Foto/Zita Menezes

“Ateru ne’e metodu atendimentu emerjénsia de’it, la’ós uza bá tempu naruk tanba ne’e mak diak liu labele ateru bei-beik, maibé bele implementa ona projetu halo estrada ne’ebé ho kualidade bá ita-nia povu sira iha Munisípiu Ermera, tanba populasaun sira presiza estrada ne’ebe di’ak hodi fasilita sira nia movimentu  no labarik sira bele asesu bá eskola ho lalais,” Xefe Bankada PD Manuel Noronha, bá jornalista sira iha PN, Tersa (09/09/2025).

Deputadu ne’e afirma komisaun  D trata asuntu ekonomia no Dezenvolvimentu iha Parlamentu Nasionál bá  halo fiskakiliazasaun iha Munisípiu Ermera  to’o iha Suku Hatolia no Letefoho kondisaun estrada maiória ladi’ak.

“Atu hatete de’it katak Ministru Obra Públika (MOP) presiza tau atensaun bá kondisaun  estrada ne’e tanba ita bele hatete katak Ermera ne’e iha produtu lubuk hanesan Kafé, Banila no seluk tán ne’ebé presiza Transporte mai Díli hodi bele faan,”nia dehan.

Nia hatutan sé kondisaun  estrada nafatin hanesan ne’e, agora tama ona fulan Setembru la kle’ur tán tama bá fulan Outubru Novembru tempu udan mai, tanba ne’e husu bá MOP atu aselera lalais projetu reabilitasaun estrada Ermera  tanba orsamentu aprová ona.

“Sé tenderizasun seida’uk la’o mak Ministru Obra Publiká  presiza aselera lalais prosesu ne’e, sé tenderizasun la’o tiha ona karik implementa ona nune’e bele ajuda ita nia povu iha Munisípiu Ermera para bele fasilita lori sira nia produtu mai faan iha Nasional,”tenik nia.

Reprezentante povu ne’e subliña, inisiu kuandu atu loke tenderizasun ida primeiru tenke  iha planu dezeñu BOQ maka foin loke tenderizasun signifika katak buat hotu-hotu loos ona, se loke ona tenderizasun tanba saida mak labele fó bá kompañia sira neee atu kaer projetu hodi hahu ona servisu.

Jornalista: Zita Menezes