Hatutan.com, (23 Setembru 2025),Díli—Primeiru-Ministru  Kay Rala Xanana Gusmão, promete ba haree konstrusaun edifisiu sentrál  Rádiu Televizaun Timor-Leste, Empreza Públiku (RTTL,E.P) ne’ebé to’o oras ne’e la hatudu progresu.

Lee Mós: Projetu Edifísiu Sentrál RTTL, E.P Atraza, PT Aulia Multi Sarana Husu Tan Adisionál

PT Aulia Multi Sarana lori sai ona sasán balu iha terrenu projetu konstrusuan edifísiu sentral foun RTTL,E.P. Foto/Dok

Konstrusaun edifísiu foun RTTL,E.P  previstu ho investimentu ida  US$5,970659,11 ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés) ho nia kontratu atu termina  iha fulan-Marsu 2026.

Projetu konstrusaun ba Edifisiu Sentrál RTTL,E.P ne’e ezekuta husi kompañia internasionál PT Aulia Multi  Sarana husi Indonézia.

Primeiru-Ministru Xanana Gusmão hateten, tuir nia hatene prosesu konstrusaun ne’e kleur tanba rai ne’e  okos bee maka nakonu, tanba ne’e  presiza halo estudu ka  soil test.

“Kona-bá abandona ne’e ha’u la hatene, depois maka ha’u sei bá haree, maibé tuir informasaun katak iha ne’ebá ne’e bee iha kraik bee maka nakonu, ne’ebé tenke halo estudu foun,” PM Xanana hateten bá Jornalista sira iha Kuartel  Jerál PNTL, Tersa (23/09/2025).

Xanana hateten konforme informasaun husi Sekretáriu Estadu Komunikasaun Sosiál (SEKOMS),  Expedito Loro Dias Ximenes katak  konstrusaun edifísiu Sentrál Rádiu Televizaun Timor-Leste, Empreza Públika (RTTL,E.P) paradu tanba  empreza PT Aulia Multi Sarana husu tan orsamentu adisionál bá Programa Nasoins Unidas ba Dezenvolvimentu (UNDP).

Kona-bá rezultadu teste soil segundu faze nian, molok ne’e,  Sekretáriu Estadu Komunikasaun Sosiál (SEKOMS) Expedito Dias Ximenes hateten, nia la hatene    tanba UNDP  maka hatene buat hotu kona-bá teste sira ne’e hotu.

Kona-bá dokumentu  hothotu  bá konstrusaun edifisiu sentrál RTTL, E.P ne’e , UNDP hato’o ona parte Governu, tuir Expedito  katak  Governu seidauk simu dokumentu ne’e.

“Sira  fó hatene de’it agora halo prosesu foun  fali, maibé ha’u la hatene prosesu foun saida ha’u la hatene,  kompañai  PT Aulia Multi Sarana la’ós halai ida, maibé tuir informasaun ne’ebé ami hetan parese husu tan osan adisionál  bá iha UNDP,  maibé husu osan hira mós ha’u  la hatene, maibé UNDP sente katak osan adisionál laiha tanba osan ne’e apoiu husi Governu Japaun,” Sekretáriu Estadu Komunikasaun Sosiál (SEKOMS) Expedito  Dias Ximenes hateten bá Hatutan.com  iha Palásiu Prezidensiál, Díli,  Tersa (02/09/2025).

Expedito esplika, tanba kompañia husu tan  osan  adisionál laiha resposta  husi  UNDP, nune’e kompañia sente katak laiha forsa  no  kapasidade atu kontìnua  halo konstitusaun ne’e.

Expedito Dias Ximenes konsidera parese  prosesu bá oin atu garantia konstrusaun edifísiu sentrál RTTL E,P ne’e, UNDP sei loke fali  konkursu foun.

Fó hanoin fila fali katak, projetu konstrusaun  edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 ne’ebé ezekuta husi kompañia internasionál PT Aulia Multi Sarana husi Indonézia la’o atraza tebetebes.

Projetu ne’ebé sai hanesan legacy husi Governu da-ualu (8) liuhusi Ministériu Asuntu Parlamentár no Komunikasaun Sosiál (MAPKOMS) no ezersísiu estra-ordináriu husi Prezidente Konsellu Administrasaun RTTL,E.P altura ne’ebá José António Belo “Taraleu”, konsege hala’o nia lansamentu ka hatuur fatuk-inan, husi  Primeiru-Ministru (PM), Kay Rala Xanana Gusmão iha loron 19 fulan-Dezembru tinan 2024.

Sura husi loron serimónia hatuur fatuk-inan to’o agora empreza internasionál  husi Indonézia, PT Aulia Multi Sarana, seidauk hatuur nia fundasaun ka fondasi no seidauk hatudu esforsu ba mobilizasaun ekipamentu iha terrenu konstrusaun tanba empreza enfrenta difikuldade no prejudika progresu konstrusaun la’o tuir nia kontratu servisu.

Edifísiu sentrál RTTL,E.P   nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun  no jornalista na’in-600.

Iha andar da-haat leten ne’e  fatin sorumutuk ho naran auditóriu Nino Konis Santana ho kapasidade akomula ema na’in-1000.

Iha fulan-Outubru tinan 2023, UNDP lansa konkursu  dezeñu ho site assessment no hafoin iha fulan-Jullu tinan 2024 no fulan-Agostu 2024 hetan aprovasaun  bá dezeñu husi Ministériu Obras Públika (MOP) depois lansa kedan  bá konsursu internasionál  hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho total kustu ba projetu ne’e $3,760,405.00.

Iha akordu ne’ebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e,   kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé  realidade PT Aulia Multi Sarana  aluga de’it eskavadora  ida ho karreta baskulante rua (2) ka tolu (3) husi empreza nasionál TINOLIN, Lda, maibé to’o agora fasilidade sira ne’e la estasiona ona iha fatin projetu, inklui terrenu projetu nian la hatudu progresu no paradu total.

Jornalista: Marcelino Tomae