Hatutan.com, (01 Outubru 2025), Díli– Komisáriu Komisaun Anti-Korrupsaun (CAC siglá portugés), Rui Perreira dos Santos,Kuarta (01/10/2025), hateten CAC seidauk simu keixa kona-bá Vise-Ministru Saúde José dos Reis Magno nia oan feto ne’ebé servisu iha nia aman nia  gabinete no  hetán hotu bolsu estudu espesialidade dedisina ba Kuba iha Ministériu Saúde.

Lee Mós: Vise-Ministru Saúde José dos Reis Magno Nia Oan Feto Servisu iha Nia Gabinete Hetán Bolsu Estudu Mós iha Ministériu Saúde

Komisáriu CAC, Rui Pereira. Foto/Dok

“Ida-ne’e Komisáriu la iha komentáriu, tanba seidauk simu keixa ruma, ami rasik mós seidauk halo rekolla informasaun sira ne’e. Ita rona lia anin de’it ne’e ami labele pronúnsia buat ruma, maibé ita presiza halo identifikasaun rekolla dadus rekolla informasaun,” Komisáriu CAC, Rui Perreira dos Santos bá jornalista sira iha Parlamentu Nasionál.

Komisáriu CAC afirma daudaun ne’e CAC fokus hela bá kazu sira ne’ebé maka tama ona iha CAC.

“Balu hodibainhira husu kona-bá APORTIL nian servisu sira ne’e ita la’o nei-neik ita borong hotu tempu laiha, ne’ebé ita tenke halo saida maka mai uluk ita hala’o uluk,ne’ebé mai tuir ita sei prosesu,” Komisáriu CAC hateten.

Tuir informasaun ne’ebé Hatutan.com rekolla katak oan feto husi Vise-Ministru  bá asuntu Fortalesimentu Institusionál Saúde (VMFIS), José dos Reis Magno, ne’ebé mós servisu iha gabinete nia aman nian hetan bolsu estudu iha duni mós Ministériu Saúde hodi hamosu dúvida ba prosesu konkursu bolsu estudu ne’e rasik no deskonfia iha konflitu interese.

Informasaun ne’ebé iha mós katak husi konkorente sira ba bolsu estudu hodi foti espesialidade iha Kuba ne’e, inklui parte sira balun iha Ministériu Saúde, konsidera konkursu ba bolsu estudu ne’e deskonfia iha tendénsiu  pratika nepotizmu no familiarizmu, tanba derrepente deit Vise-Ministru José  dos Reis Magno nia oan feto selesionadu hodi hetan mós bolsu estudu ne’e.

Informasaun  husi fontes sira ne’ebé husu atu la bele públika sira-nia identidade tanba bele iha risku ba sira-nia servisu iha Ministériu Saúde haktuir, iha tinan kotuk Vise-Ministru José dos Reis Magno, nia mane-foun nu’udár la’en husi Vise-Ministru  nia oan feto, hetan ona oportunidade bolsa estudu ba foti espesialidade iha Kuba no agora ho sira-nia aman hanesan Vise-Minstru ida iha Ministériu Saúde aproveita hodi oan feto hetan tan bolsu estudu ba tuir nia laen iha Kuba.

Jornalista : Zita Menezes