Hatutan.com, (11 Outubru 2025), Díli–Autoridade seguransa Timor-Leste nian, kompostu husi Servisu Intelijénsia Polísia  (SIP) Munisípiu Díli, Departamantu Servisu Investigasaun Kriminál (DSIK), Forsa Polísia (FP) no Sevisu Nasionál Intelijénsia (SNI), indentifika kontentór ida iha área Tibar, Postu Administrativu Bazartete, Munisípiu Liquiça, nakonu ho kikat-musan (munições).

Lee Mós: Sidadaun Xinés Ne’ebé Membru CSP Fasilita Kaer Kilat ho Pistola hodi Treinu Nu’udár Bilionáriu Mai Timor ho Zet Privadu

Autoridade Timor-Leste identifika kilat-musan iha kontentór ida iha Tibar, Postu Administrativu Bazartete, Munisípiu Liquiça. Foto/Espesiál

Informasaun ne’ebé Hatutan.com asesu husi fontes sira autoridade servisu sekreta Timor-Leste  nian, katak  autoridade SIP Munisípiu Díli, DSIK, FP no SNI ba iha Tibar hodi buka tuir ema sira ne’ebé sobu kontentór ne’e no to’o iha fatin konsege identifika kontentor ida ne’ebé sira sobu iha armazen empreza nasionál ida nian ne’ebé  lokaliza iha Aldeia Turleu, Suku Tibar, Posto Administrativu Bazartete, Munisípiu Liquiça.

Fontes ne’e haktuir iha armazén refere autoridade sira identifika kontentór ho medida  20FIT ne’ebé hatama husi kompañia internasionál ida ne’ebé lokaliza iha rua Mausoi, Tibar, Bazartete.

Informasaun ne’ebé parte servisu sekreta sira rekolla katak na’in  ba empreza ne’e ema estranjeiru no nasionalidade Xina ho naran inisiál YXL.

Tuir  mós informasaun parte servisu sekreta sira-nian katak motivu hatama sasan sira-ne’e katak atu halo tambang no tuir lista kontentór ne’e mai ho ró husi Estadus Unidus Amérika iha loron 20 fulan-Setembru  tinan 2025.

Kontentór ne’e  transit iha Singapura iha loron 23 fulan-Setembru tinan 2025 hafoin transporta fali mai iha Portu Tibar Timor-Leste iha loron 08 fulan-Outubru tinan 2025.

Kilat-musan ne’ebé identifika iha kontentór laran. Foto/Espesiál

Autoridade Timor-Leste sira identifika  item ka sasan  sira iha kontentór ho medida 20FIT ne’e nia laran mak hanesan:

• Bidon totál 26: kompostu husi projétil bidon rua (2), imbolku (dulas rahun ona) bidon 23, kaliber 12 (Rahun) bidon ida (1).
• Dos boot tolu (3): kompostu husi item imbolku tomak (kahur hamutuk fatuk), dos boot ida (1), imbolku (dulas rahun) dos rua (2).

Iha Sábadu (11/10/2025), haleu tuku: 11:20 dadeer, Hatutan.com konfirma ho portavós Komandu Jerál Polísia  Nasionál Timor-Leste (PNTL), Superintendente Polísia  João Belo dos Reis, liuhosi telefone hateten, nia seidauk bele ko’alia buat ida ba informasaun ne’e tanba sei  iha prosesu identifikasaun.

 “Ne’e ha’u la bele ko’alia lai tanba prosesu indentifikasaun sei la’o hela. Ha’u hetan sumáriu mak  ha’u aprezenta. Agora prosesu indentifikasaun la’o hela,” Superintendente Polísia  João Belo dos Reis hateten.

Ekipa Hatutan.com