Hatutan.com, (10 Outubru 2025), Díli-Polísia Nasionál Timor-Leste (PNTL) sei bolu operador telekomunikasaun Telemor no Telkomsel hodi submete ba investigasaun tanba deskonfia fasilita sim card ba operador sira jogu online ilegál.

Polísia halo apreensaun ba sim card Telemor ho Telkomcel ne’ebé apoiu jogu online ilegál iha Timor-Leste. Foto/Juvinal Cabral dos Santos

“Relasaun operasaun, buska no apreensaun iha Kinta-kalan, 09 fulan-Outubru 2025, Polísia hetan informasaun husi ita nia komunidade sira katak, depois ami anunsiu governu nian katak jogu online hotu-hotu bandu mais iha fatin balun sei loke nafatin. Nune’e informador no komunidade sira informa mai, ami lansa operasaun iha tuku 23:00 Otl iha Zita Plaza no mós  iha Colmera nian,”  Portavós PNTL, Superintendente Polísia João Belo dos Reis, informa  ba jornalista sira  iha Kuartél Jerál PNTL, Sesta (10/10/ 2025).

Iha operasaun  ne’e autoridade seguransa deteta duni jogu online la’o hela iha  Zita Plaza no Colmera no husi operasaun ne’e Polísia detein sira ne’ebé mak nain ka autór jogu online hamutuk nain-10 sidadaun estranjeiru ho nasionalidade  Xina no mós Indonézia ne’ebé prosesu identifikasaun la’o hela.

“Evidensia sira ne’ebé Polísia rekolla husi jogu online ne’ebé mak sira la’o dadauk mak parte Zita Plaza nian telefone  Readmi, Realmi, Xiomi hamutuk 68, tablet 1, laptop 5, sim card Telemor 521, Telkomcel 375, no operador jogu online iha parte Colmera konsege foti laptop 2, telefone 34,  no seluk-seluk tan,” Superintendente Polísia João Belo dos Reis hateten.

Polísia rekolla mós sim card husi operador telekomunikasaun Telemor no Telkomcel kuaze kaixa boot ida resin ne’ebé sei iha prosesu kontajen hela.

“Ami husu kooperasaun husi ema hotu-hotu, komunidade iha fatin ne’ebé de’it karik hetan informasaun jogu online ho tipu hanesan ne’e sei iha kontaktu ami, Jogu online ida agora ne’e liu husi telemovel la uza komputador, sira uza telefone kontaktu ba nasaun seluk ne’ebé mak joga,” João Belo dos Reis hateten.

Jornalista: Juvinal Cabral dos Santos