Hatutan.com, (23 Outubru 2025), Díli– Prezidente Komisaun Funsaun Públiku (CFP, sigla portugés), Agostinho Leténcio de Deus,  hateten lista funsionáriu públiku hamutuk na’in-2900 tama iha reforma obrigatóriu iha loron 02 fulan-Janeiru 2026.

Lee Mós: 02 Janeiru 2026, Reforma Obrigatóriu Funsionáriu Públiku 2000-resin

Prezidente CFP, Agostinho Leténcio de Deus. Foto/Dok

Prezidente Komisaun Funsaun Públiku (KFP) Agostinho Leténcio de Deus  afirma CFP  hato’o bei-beik ona dehan katak  prosesu ne’e iha tinan ida-ne’e la’o tanba intermu estatutu Funsaun Públika ne’ebé altera iha tinan 2024, husi ne’e mai CFP halo prosesu to’o agora.

“Ita nia espetativa no dezisaun iha tinan oin hahú husi loron 02 fulan-Janeiru 2026 ne’e hahú ona halo reforma obrigatóriu bá funsionáriu sira ne’ebé maka liu ona idade tinan 65 ho total na’in-2900 maka sei reforma obrigatóriu,” Prezidente Komisaun Funsaun Públiku Agostinho Leténcio de Deus bá jornalista sira iha PN, Kinta (23/10/2025).

Nia afirma funsionariu públiku atual hamutuk ona 39.000 kompostu husi funsionariu permanente hamutuk iha 34.000 enkunatu ajente administrasaun iha 5.000.

Kona-bá totál forsa traballu iha teritóriu tomak iha administrasaun públika maka kuaze 70.000 ne’e inklui ona 39.000 funsionariu permanente no ajente,  inklui 20.000 funsionáriu kazuál no mós asesór sira ne’ebé maka kontratu termu sertu.

Jornalista: Zita Menezes