Hatutan.com, (27 Outubru 2025), Díli- Sekretáriu Estadu Formasaun Profisionál no Empregu   (SEFOPE), Rogério Araujo Mendonça , informa iha komemorasaun loron traballadór ne’ebé monu iha loron 01  fulan-Maiu,  sei fó anúnsiu públiku kona-bá hasa’e saláriu minimu.

Lee Mós: May Day 2025, KSTL Aprezenta Ejijénsia Lima no Konsidera Saláriu Mínimu $115 La Refleta Ona Inflasaun 60%

Sekretáriu Estadu Formasaun Profisionál Empregu, Rogério Araújo Mendonça. Foto/SEFOPE.

Tinan barak ona desde Timor-Leste restaura nia ukun aan iha 20 fulan-Maiu 2002, Timor-Leste termina saláriu minimu   $115, maibé daudaun ne’e Governu ho parseiru sira iha ona konkordansia atu hasa’e salariu minimu ne’e, maske seidauk bele fó sai nia mantante sa’e ba hira.

“Ha’u hanoin katak tarde liu mak bá iha tinan 2026, antes komemora loron traballadór ne’ebé  monu iha  loron 01  fulan-Maiu, ha’u fiar katak SEFOPE sei anúnsiu bá iha públiku katak  saláriu minimu ne’ebé  $115, sei sa’e bá  to’o iha  saláriu ne’ebé mak ami sei tuur hamutuk ko’alia,” Sekretáriu Estadu SEFOPE Rogério Araújo Mendonça bá jornalista sira iha PN, Segunda (27/10/2025).

Sekretáriu Estadu Rogério Araújo Mendonça, afirma nian parte seidauk bele fó sai numeru saláriu minimu ne’e to’o hira, nune’e sei fó sai numeru saláriu ne’e bainhira fó sai ona anúnsiu bá públiku kona-bá hasa’e saláriu minimu.

“Numerú ha’u labele ko’alia lai, maibé rezultadu ne’e iha loron traballadór sai hanesan oferta boot ida bá traballadór Timor-Leste,”tenik nia.

Fó hanoin fali katak  durante ne’e  saláriu minimu sai hanesan preokupasaun prinsipál traballadór sira. sosidade sivíl, Parlamentu Nasionál, Konsellu Nasionál Traballu  Konfederasaun Sindikatu Timor-Leste (KSTL) no mós parte relevante sira seluk ne’ebé sempre ejizi Governu atu hasa’e saláriu minimu $115, tanba la sufisiénte hodi atende bá nesesidade loro-loron no hadi’a ekonomia.

Jornalista : Zita Menezes