Hatutan.com, (25 Novembru 2025), Díli– Ministru Transporte no Komunikasaun (MTK), Miguel Marques Gonçalves Manetelu akompaña husi Ministru Planu no Investimentu Estratéjiku  (MPIE), Gastão de Sousa, Ministra Finansas, Santina J. R. F. Viegas Cardoso, ho konvidadu onra sira,  Tersa (25/11/2025), halo lansamentu   trial  (koko) kabu submarine hodi haree velosidade internet ne’e oinsá no tuir planu sei halo lansamentu ba públiku iha fulan-Maru, tinan 2026.

Lee Mós: MTK Prioritiza Instalasaun Kabu Submarinu ho Konstrusaun Aeroportu Prezidente Nicolau Lobato iha 2025

Ministru Transporte no Komunikasaun (MTK), Miguel Marques Gonçalves Manetelu halo lansamentu ba trial kabu submarinu, Tersa (25/11/2025). Foto/Zita Menezes

Ministru Transporte no Komunikasaun (MTK) Miguel Marques Gonçalves Manutelu hateten lansamentu   trial ne’e bá uluk liña Governu nian  no seidauk bele oferese bá operadór no komersiante  sira.

“Ita seidauk fó operadór  sira, ita hakarak haree semana ida ka semana rua haree took nian velosidade ne’e oinsá. Depois semana hirak tuir mai ita bele fó ona bá operadór  sira no mós ISP sira, nune’e sira mós trial  hotu. Agora ita espera katak ida atu tama ba merkadu, lansamentu ida tama bá komersial nian bele iha antes fulan-Marsu 2026,” Ministru Miguel Manetelu haktuir bá jornalista sira iha Bebonuk.

Antes ne’e Governu  liberaliza ona  setór telekomunikasaun, katak polítika klaru se kompete ho operadór seluk mak balu mate ne’e natureza husi kompetisaun mak nune’e, sira ne’ebé la forte sei taka no espera labele akontese no liuliu operadór Estadu nian labele hamate  sira ne’ebé halo negosiu iha ISP no operadór telekomunikasaun sira.

“Atu ko’alia loos nia kapasidade Austrália reserva bá ita la’os nia mai hotu ne’e ita tenke sosa, nia reserva bá ita ne’e 13,5 terabyt no 13,5 ne’e depende bá ita nian nesesidade merkadu nian,” nia tenik.

Iha fatin hanesan Prezidente Autoridade Nasional Komunikasaun (ANC, sigla portugés), Flavio Cardoso Neves afirma lansamentu trial  ne’e dehan katak komesa ho trial no  ANC sei ajuda CTL,E.P ne’ebe sei jere kabu submarinu no sei implementa presu ne’ebé normal iha merkadu.

ANC hanesan reguladór ida atu jere kompetisaun n presu ne’ebe mak atu implementa bá iha kabu Timor-Leste nia presu labele barulu, katak  presu normal iha merkadu, tanba ne’e mak ANC servisu hamtuk ho CTL,E.P atu haree asuntu ida-ne’e.

Jornalista: Zita Menezes