Hatutan.com, (09 Dezembru 2025), Díli- Governu Timor-Leste ho Austrália iha kompromisu forte hamutuk kombate krime transnasionál, liuliu atividade online scamming.

Lee Mós: Tribunál Aplika Medida Aprezentasaun Periódika Bá Jerente Grand Dragon Lotaria

Ministru Interiór, Francisco da Costa Guterres. Foto/Juvinal Cabral dos Santos

Ministru Interiór (MI), Francisco da Costa Gustrres,  nafatin estabelese komunikasaun no enonkontru parseria ho autoridade Austrália liuhosi  Timor-Leste Police Development Program (TLPDP) no Australian Federal Police (AFP) oinsá apoiu malu kombate krime oioin ne’ebé fó amesa ba estabilidade nasionál.

“Ami kontinua diskute hela kona-bá oinsá Austrália nia apoiu ba iha krime organizadu sira ka krime transnasionál sira,” Ministru Interiór Francisco da Costa Guterres hateten ba jornalista sira hafoin simu apoiu Mobile Closed Circuit Television (CCTV) husi Timor-Leste Police Development Program (TLPDP) no Australian Federal Police (AFP)  iha Ministériu Interiór, Tersa (09/12/2025).

Atu kombate krime organizadu sira, liu-liu jogu online ne’e, di’ak ida ba órgaun polisia kriminál ne’e, tanba Governu hasai tiha rezolusaun ida kona-bá taka tiha jogu online sira ne’e.

Rezolusaun governu hodi taka jogu online ne’e promove hosi Ministériu Turismu no Ambiente hodi propoin ba Primeiru-Ministru, depois aprova iha Konsellu Ministru iha fulan hirak liubá iha tinan ida-ne’e.

Rezolusaun Governu ne’e sai hanesan baze PNTL, liu-husi Diresaun Servisu Investigasaun Kriminal sira para halo atuasaun no buka tuir autor sira ne’ebe mak kria jogu online.

“Ita sei la’o nafatin buka tuir autór ba jogu online sira, ita foin hetan balu, balu ita kontinua la’o, ita kontinua vizilante no kontinua atentu para depois se de’it mak iha intensaun aat atu hakarak viola regra ne’ebe mak iha hakarak ka lakoi tenke hatan ba iha Tribunál,” Francisco da Costa Gusterres afirma.

Iha fatin hanesan, Komisáriu Adjuntu Krime Australian Federal Police (AFP) Ian McCartney, hateten, vizita mai iha Timor-Leste hasoru malu ho Ministru Interiór Francisco da Costa Guterres, hodi apresia nivel kooperasaun kolaborasaun entre ajénsia Timor-Leste ho Austrália hodi hatudu kooperasaun bilateral kapás tebe-tebes.

“Ita hotu enfrenta dezafiu ne’ebe mak maka’as iha krime organizadu sira  ho buat sira seluk,” Ian McCartney tenik.

Nia esplika, enkontru ho MI ne’e mós mantein kooperasaun ne’ebe forte hodi bele hasoru dezafiu sira, nune’e Embaixada Austrália iha Timor-Leste kolabora di’ak ho Governu Timor-Leste hodi apoiu maka’as intermu polítika, teknika no mós parte segura, nune’e buat hotu la’o kapas tebes.

Embaixadora Austrália iha Timor-Leste, Caitlin Wilson hatutan, vizita ida ne’e hatudu kompromisu kolaborasaun di’ak ne’ebeémaka Governu Austrália ho Timor-Leste.

“Ba oin oinsá hodi reforsa órgaun polísia kriminal sira atu bele hala’o servisu di’ak, entaun vizita atu hatudu kompromisu hosi AFP no TLPD hodi kombate krime organizadu no trafiku umanu inklui mós krime jogu online sira,” Embaixadora Caitlin Wilson hateten.

Fó hanoin fali katak,  iha  Kuarta (03/12/2025), e Polísia Nasional Timor-Leste (PNTL) liuhusi Diresaun Servisu Investigasaun Kriminál (DSIK)   lidera husi Superintendente Asistente Polísia Mouzinho T. Correia, hamutuk ho servisu Migrasaun  hala’o buska no apreensaun ba jogu Lotaria Grand Dragon ne’ebé lokaliza iha Pantai Kelapa besik Timor Plaza inklui nia sukursal iha Timor Plaza.

Iha loron tuir mai,  Kinta (04/12/2025), Primeiru-Ministru (PM) Kay Rala Xanana Gusmão tun direita hodi orienta taka  atividade jogu Lotaria Grand Dragon.

Jornalista: Juvinal Cabral dos Santos