Hatutan.com, (22 Dezembru 2025), Díli- Prezidente Repúblika, José Ramos-Horta,  Segunda (22/12/2025), iha Palásiu Prezidénsial, konvoka reuniaun konsellu superior defeza seguransa hamutuk ho Primeiru-Ministru Kay Rala Xanana Gusmão hodi ko’alia no haree planu seguransa iha rai laran.

PR José Ramos-Horta konvoka reuniaun Konsellu Defeza no Seguransa iha Palásiu Prezidensiál, Segunda (22/12/2025). Foto/Zita Menezes

Hafoin enkontru  Primeiru-Ministru Kay Rala Xanana Gusmão afirma Prezidente Repúblika José Ramos-Horta konvoka konsellu superior defeza seguransa, atu haree ba planu seguransa iha ra laran nomós haree asuntu seluk.

“Ami sei la fó ba imi atu hatene, Prezidente restaura ba sosiedade tanba klimá paz dame no domin, ne’ebé akontese buat ruma iha ne’e, iha ne’ebá mós ne’e ita la foti hanesan obstaklu boot tanba la oho malu ne’e duni prezidente mós hakarak hato’o katak ambiénte hanesan ne’e iha dame nian laran to’o fin do ano, ita hotu hamutuk kontenti,” PM Xanana Gusmão hateten.

Xefe Governu hatutan tán katak, “hodi haree ba saida mak mak ita hotu halo ona iha tinan 2025, hodi nune’e bele, prezisa kurizi, tenke kurizi presiza halo buat foun tenke halo buat foun, atu lori nafatin rai ne’e ba dalan loos, mak ne’e de’it boas festa natál no feliz tinan foun ba imi hotu,”.

Reuniaun konsellu superior defeza seguransa ne’ebé lidera Prezidente Repúblika José Ramos-Horta ne’e partisipa husi Primeiru-Ministru Kay Rala Xanana Gusmão, Ministru Defeza Donanciano do Rosário da Costa Gomes “Pedro Klamar Fuik”, Tenente jenerál F-FDTL Falur Rate Laek, Ministru Interior Francisco  da Costa Guterres, Ministru Justisa Sergio da Costa Hornai de Jesus, Membru Komisaun B-PN, Deputadu David Dias Ximenes “Mandati” nomós Komandu Jeral PNTL Henrique da Costa.

 Jornalista : Zita Menezes