Hatutan.com, (06 Janeiru 2026), Díli- Reprezentante povu iha Uma-Fukun Parlamentu Nasionál lamenta sidadaun estranjeiru  ho nasionalidade Indonézia ne’ebé falsifika dokumentu hodi asesu ba pensaun veteranu.

Servisu Migrasaun entrega sidadaun Indonézia ba Servisu Investigasaun Kriminál tanba deskonfia falsifika dokumentu hodi hetan pensaun veteranu. Foto/Média PNTL

Reprezentante povu Timor-Leste iha Parlamentu Nasionál  husu ba Ministériu Públiku halo investigasaun kle’an no prosesu tuir lei mak vigora iha rai ida-ne’e.

Membru PN husi Bankada CNRT, Natalino dos Santos  hateten hanesan joventude rejisténsia  ida no hetan kondekorasaun hanesan veteranu ida la menta tebes kona-bá sidadaun Indonézia ne’ebé falsifika dokumentu hodi asesu ba pensaun veteranu nian.

Nia afirma kazu ne’e hanesan referénsia ida ba Ministériu Asuntu Kombatente Libertasaun Nasionál (MACLN) no Konsellu Kombatente  Libertasaun Nasionál  (CCLN), atu haree para depois sasan sira ne’e tenke verifika didi’ak para ema sira hanesan ne’e tenke responsabilidade ba sira-nia aktu.

Nia husu presiza verifika didi’ak tanbasá mak aktu ida-ne’e akontese, no husu Ministériu Públiku atu halo investigasaun para bele hatene, sidadaun Indonézia ida bele hetan fali pensaun veteranu nian.

“Lamenta tebes-tebes hanesan Deputadu no husu responsabilidade Ministériu MACLN no CCLN atu halo verifika fila-fali ba veteranu sira ne’ebé iha, tanba ita haree katak veteranu falsu barak mak lori ona ba prosesu, no presiza fó atensaun tanba osan ne’e raan no ruin nian,” Deputadu Natalino dos Santos hateten iha PN, Tersa (06/01/2026).

Iha fatin hanesan membru PN husi Bankada FRETILIN,  David Dias Ximenes “Mandati” hateten, karik ema ne’e sidadaun indonézia oinsá mak nia bele hetan kartaun eleitoral, billeti indentidade no sertidaun RDTL hodi asesu ba dokumentu sira ne’e.

“Manobra ne’e iha fali ona ne’ebé responsabiliza ba sasan sira ne’e, entaun labele investiga de’it sidadaun Indonézia ne’e, maibé iha Timoroan mós, tanba ema sira halo halimar buat sira ne’e  ita haree took husik evolusaun investigasaun nian mak ita ko’alia,” Deputadu David Mandati hateten.

Nia husu Ministériu Asuntu Kombatente Libertasaun Nasionál (MACLN), no Konsellu Kombatente  Libertasaun Nasionál  (CCLN) tenke matan moris ba situasaun sira ne’e, tanba orsamentu sira defende hotu ba fundu petroleu de’it.

Jornalista : Zita Menezes