Hatutan.com, (20 Janeiru 2026), Díli- Desizaun Konasellu Ministru nian ne’ebé ezonera antigu prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), José António Belo Taraleu, hanesan presedente ba Konsellu Munistru atu foti disaun ezonera mós Prezidente inkompativel RTTL,E.P, Elizeu Isaac Fernandes.

Lee Mós: SEKOMS Expedito Ximenes Rekoñese Prezidente RTTL,E.P Inkompativel, PM Xanana Hein iha Konsellu Ministru

Eis Prezidente Konsellu Administrasaun RTTL,E.P, José António Belo “Taraleu” ho Elizeu Isaac Fernandes, prezidente inkompativel Konsellu Administrasaun RTTL,E.P. Foto/Dok.Repro

Iha Kuarta, 26 fulan-Fevereiru tinan 2025, Konsellu Ministru aprova rezolusaun ne’ebé aprezenta husi Sekretáriu Estadu Komunikasaun Sosiál (SEKOMS), Expedito Dias Ximenes, hodi ezonera José António Belo Taraleu husi kargu Prezidente Konsellu Administrasaun RTTL,E.P tanba hala’o kna’ar inkompativel hodi simu posse nu’udár dirijente Partidu Libertasaun Populár (PLP).

Ezonerasaun José António Belo Taraleu nian ne’e haktuir ba konformidade Dekretu-Lei nú.42/2008, 20 Novembru no nia alterasaun dahuluk iha loron 24 fulan-Outubru 2024, kona-bá transforma Rádiu Televizaun Timor-Leste, Empreza Públika no primeiru anexu maka Estatutu RTTL,E.P.

Dekreitu-lei 42/2008, artigu 13 (Estatutu ba membru Konsellu Administrasaun) numéru 1 aliña b-c,  define kona-bá Prezidente Konsellu Administrasaun RTTL,E.P, labele sai dirijente iha partidu polítika. Nune’e, iha aliña c difene mós Prezidente Konsellu Administrasaun  RTTL,E.P la bele sai titular iha kargu politíku. 

Iha fali númeru 4  haktuir mós katak Prezidente Konsellu Administrasaun  RTTL,E.P  durante nia mandatu, la bele okupa  kargu ka profisaun seluk, exetu ba knaar sira hanorin nian iha tempu parsiál.

Xefe Bankada Parlamentár PLP, Maria Angelina Sarmento, suzere atu Konsellu Ministru tenke prudente hodi foti desizaun ba Prezidente Inkompativel RTTL,E.P, Elizeu Isaac Fernandes hanesan mós ho desizaun ne’ebé KOnsellu Ministru halo ba antigun prezidente Konmsellu Administrasaun RTTL,E.P, José António Belo Taraleu, tanba natureza husi kazu hanesan tanba hala’o knar inkompatibilidade.

Deputada Maria Angelina Sarmento husu ba Prezidente  Konsellu Administrasaun RTTP,E.P, Elizeu Isaac Fernandes  ne’ebé asume  ona knaar hanesan dirijente partidu CNRT ka Primeiru Vise-Sekretáriu Ezekutivu Organizasaun Juventude Partidu CNRT (OJP-CNRT) Munisípiu Díli tenke rezigna aan husi nia  kargu ida.

Xefe Bankada PLP Maria Angelina Sarmento,  hateten tenke aplika buat sira ne’ebé hanesan ba desizaun sira ne’ebé iha ona, dezisaun uluk hateten katak Prezidente RTTP,E.P nian tenke imparsiál, labele sai dirijente partidu politíka.

“Entaun ho razaun ida-ne’e mak ezonera, sinifiká katak Prezidente RTTL,E.P ida agora prová katak nia hola parte iha estrutura partidu CNRT, klaru katak nia tenke voluntariamente rezigna aan ka sé la rezigna, SEKOMS  tenke submeter rezolusaun ba Konsellu Ministru hodi halo  ezonera ba Elizeu Isaac Fernandes tanba assume ona kargu iha partidu polítika,”  Deputada Maria Angelina Sarmento informa ba  jornalista sira iha Parlamentu Nasionál, Segunda (19/01/2026).

Reprezentante povu ne’e afirma  bele iha sénariu ida, sé Prezidente RTTL,E.P hakarak kontinua asumi knaar hanesan Prezidente RTTL,E.P, tenke rezigna aan husi kargu ne’ebé mak agora nia asumi hela hanesan Primeiru Vise-Sekretáriu Ezekutivu Organizasaun Juventude OJP-CNRT Munisípiu Díli.

“Sé kuandu nia rezigna aan, nia bele kontinua asumi kargu hanesan Prezidente RTTL,E.P, mais sé nia hakarak kontinua asumi ninian posizaun hanesan estrutura iha partidu entaun nia tenke rezigna aan husi kargu Prezidente RTTL,E.P,  sé la rezigna aan SEKOMS iha devér atu ezonera nia  tanba ne’e ezijénsia husi lei no mós média estatál tenke diriji husi ema indepedénsia ne’ebé la asumi kargu politíka ruma,” nia tenik.

Iha sorin seluk, membru PN husi  Bankada FRETILIN, Maria Angelica Rangel hateten,  lei la dehan katak ema ida  husi partidu ida ka dirijente husi  partidu balu bandu atu ba jere instituisaun públiku.

“Mais buat ne’ebé ha’u hatene nia labele iha kargu rua iha instituisaun públiku, maibé iha partidu ne’e ha’u la iha komentáriu, tanba nia estrutura partidu nia bele asumi tán kargu Governu sira nian. Mais iha instituisaun estadu mak labele iha kargu rua tanba ema  bolu dehan inkompatibilidade tuir lei hateten,” Deputada Maria Angelica Rangel  hateten.

SEKOMS La Rekoñese Karta Rejignasaun

Prezidente  Inkompativel  RTTL,E.P, Elizeu Isaac Fernandes, duun  Sekretáriu Estadu Komunikasaun Sosiál  (SEKOMS), Expedito Dias Ximenes maka la rekoñese karta rejignasaun husi Kargu Prirmeiru Vise-Sekretáriu Ezekutivu OJP-CNRT Munisípiu Díli.

Elizeu Isaac Fernandes, bá Hatutan.com telefoneka,  Segunda (19/01/2026), rekoñese nia simu kna’ar hanesan Primeiru Vise-Sekretáriu Ezekutivu OJP-CNRT Munisípiu Díli,  ho razaun  katak  tanba nia iha gabinte SEKOMS  mós ema polítiku  no  lidera RTTL,E.P mós hanesan  ema polítiku iha partidu CNRT.

“Hanesan    Timoroan ida ha’u hakruuk bá lei, saída maka desizaun Konsellu Ministru nian,  ha’u 100% hakruuk tanba ne’e desizaun,  desizaun saída de’it maka sai, ha’u simu. Maske ha’u husi li’ur de’it, ha’u nafatin kontribui bá ita-nia rai, tanba kontribui bá ita-nia rai ne’e la’ós   tenke  hetan pozisaun, tanba ne’e ha’u hanesan Elizeu Isaac ha’u prontu simu desizaun saída de’it husi Konsellu Ministru, katak se dehan ha’u sai, ha’u tenke sai,,” Elizeu Isaac Fernandes hateten.

Elizeu Isaac Fernandes, informa   depois nia hetan konfiansa nu’udar Primeiru Vise-Sekretáriu Ezekutivu OJP-CNRT Munisípiu,  nia  haree katak lei la fó dalan,  entaun iha loron 05  fulan-Janeiru  2026 halo karta rejignasaun husi partidu nian.

Nia esplika, karta rejignasaun ne’e hatama bá gabinte SKOMS, halo bá Ministru Konsellu Ministru, haruka bá entidade hothotu katak, nia  la asume kargu partidu ona dezde kedas iha loron 05 fulan-Janeiru ne’e,

“Ne’e signifika ha’u la’o tuir Lei ne’ebé vigór, ne’ebé kabe ba pozisaun RTTL  nian entaun, ha’u hili sai husi kargu polítiku, hodi hili  loloos bá ha’u nia pozisaun,” nia hateten.

Banhira Elizeu kandidata aan no konkorda hetan nomeasaun bá kargu polítika nu’udár Primeiru Vise-Sekretáriu  Ezekutiva OJP-CNRT Munisípiu Díli  ne’e nia  kosiente  iha hela inkompatibilidade nu’udár prezidente konsellu administrasaun  RTTL,E.P, maibé tanba obrigasaun husi partidu nia tenke simu.

“Ha’u ne’e atu hateten katak ha’u ne’e ema polítiku, tanba ne’e maka banhira ha’u nia partidu, joven sira, ha’u nia kolega sira, grupu fó fiar mai ha’u, ha’u simu,  maibé depois ha’u hateten bá sira katak ha’u tenke rejigna aan  tanba servisu ne’ebé fó mai ha’u inkompativel tuir Lei mo Estatutu RTTL,E.P nian,” nia dehan

Nia esplika, sei ha’u kontinua nafatin iha estrutura polítiku,   konsidera    ne’e inkompatibel. Tanba inkompatibilidade signifika ema asume pozisaun rua, tama ne’e  Elizeu afirma antes Hatutan.com hato’o informasaun ne’e, nia rejigna aan tiha ona.

Nia afirma tan katak uanhira Konsellu Ministru ezonera nia husi kargu Prezidente RTTL,E.P, nia prontu 100%,  tanba kargu ne’e la bele tau iha fuan no la bele tau iha bolsu.

Jornalista: Zita Menezes/Marcelino Tomae