Hatutan.com, (02 Fevereiru  2026), Díli– Prezidente Komisaun A Parlamentu Nasionál ba asuntu Konstituisaun no Justisa,  Deputadu Natalino dos Santos,  husu Governu atu tau atensaun ba asesór internasionál sira ne’ebé hala’o servisu iha liña ministeriál sira tanba lei barak mak asesór sira trava hela.

Lee Mós: Xanana Husu Bankada Fretilin Aprezenta Dadus Kona-bá Asesór Simu Saláriu $25,000

Prezidente Komisaun A PN, Natalino dos Santos, halo intervensaun iha plenária hodi bolu atensaun ba servisu asesór internasionál nian. Foto/Zita Menezes

Nia afirma lei barak mak Governu aprová tiha ona, maibé asesór sira seidauk halo redasaun finál hodi aprezenta iha Parlamentu Nasionál. Ezemlpu Lei Sibernetika ka cybercrime,  lei partidu polítika no rejime kontraditóriu kuazé fulan-lima-resin seidauk tama iha Parlamentu Nasionál.

“Ha’u hakarak bolu atensaun. Ita tenke haree asuntu asesór sira, ha’u haree katak iha grupu interese husi asesór sira, sira uza ita hanesan objetu para depois ba sira nian interese.  Iha grupu balu ne’ebé trava malu iha liña ministériu balu. Ita haree katak asesór sira ne’ebé mai balu veteranu tiha ona,  sira hatene tiha ona ita nian frakeza sira tenta trava para ita depedénsia nafatin ba sira.  Favór ida, Vise-Ministru Asuntu Parlamentár bele ko’alia iha Konsellu Ministru para bele haree,” Deputadu Natalino dos Santos hateten liuhosi nia intervensaun  iha plenária PN, Segunda (02/02/2026).

Tuir membru Parlamentu ne’e nian  haree ba asuntu ne’e ameasa ida, no iha grupu interese, entre  grupu mutin no metan no sira trava malu iha prosesu servisu nian laran. Nune’e, Deputadu Natalino dos Santos, husu asesór sira mai atu apoiu servisu Governu nian la’ós uza Timor sai objetu ba sira nian interese.

“Karik asesór  balu veteranu liu ona, di’ak liu ita haruka fila, no Governu di’ak liu halo akordu GtoG (governu ho governu) ne’ebé ita presiza asesór sira mai, ida-ne’e perigu ba ita tuir ha’u nian observasaun. Sé, sira mai para fó asesória ba administrativa  de’it Timor-oan bele tiha ona, maibé sira mai atu kompleta ita atu haree kona-bá lei ne’ebé presiza,” nia hateten.

Iha fatin hanesan Vise-Ministru Asuntu Parlamentár Adérito da Costa Hugo hateten nia parte sei hato’o asuntu ne’e iha reuniaun Konsellu Ministru.

Jornalista: Zita Menezes