Hatutan.com, (06 Fevereiru 2026), Díli-Polisia Nasionál Timor-Leste (PNTL) Munisípiu Díli, ezekuta mandadu Tribunál NUC: 0487/25.DIBCR kaptura suspeitu na’in-rua husi Munisípiu Lautém ho inisial JG no  husi Ainaro ho inisial UF relasaun kazu violasaun no koasaun seksuál ho raptu ne’ebé akontese iha loron 28 Dezembru  2025, iha Postu Administrativu Kristu-Rei, Hali Dólar, Hera.

Polísia kaptura suspeitu sira ba kazu violasaun no koasaun seksuál ho raptu. Foto/Juvinal Cabral dos Santos

“Suspeitu na’in-rua  ne’e iha ligasaun ho kazu ne’ebé akontese iha loron 28 fula- Dezembru tinan 2025, kona-ba kazu violasaun  no kazu koasaun seksuál ho raptu ne’ebé akontese iha momentu ne’ebá,” Komandante PNTL Munisípiu Díli, Superientendente Xefe Polísia Orlando Gomes,   informa ba jornalista sira iha Eskuadra Polísia Dom Aleixo, Sesta (05/02/2026).

“Mandadu Tribunál ba arguidu nain-haat, maibé agora ita kaptura ona arguidu na’in-rua ne’ebé mak halai ses husi kapitál Díli agora dadauk ita lori ona mai komandu seksaun Investigasaun, atu nune’e, ita bele submete ba iha Tribunál.”

Autoridade seguransa hatutan, dadaun ne’e sei buka tuir arguidu na’in-rua ne’ebé mak observa hela tempu badak polísia sei halo kapturasaun.

Nia informa, Komandu Munisípiu Díli detekta arguidu sira nia paradeiru iha munisípiu ne’ebé koordena kedas ho Komandu Munisípiu Lautém ho Munisípiu Ainaro hodi koordena ho sira iha terenu para buka arguidu sira subar iha ne’ebá.

“Mandadu detensaun ne’e depois arguidu sira kumpri detensaun oras  72 depois ita aprezenta ba Ministériu Públiku (MP) mak ba liu iha Tribunál,”   Orlando Gomes hateten.

Observasun Hatutan.com iha terenu, Kinta (04/02/2026), hale’u tuku 18:50 lokraik Otl, seksaun Polísia  Investigasaun Munisípiu Díli kaptura suspeitu JG  iha Lospalos Vila lori mai  edifisiu PNTL Komandu Munisípiu Díli.

Suspeitu refere uza hela alzema iha liman no lori kedas ba iha edifisiu sub-seksaun Polísia Unidade Vulnerabilidade (VPU) no kontinua ba detein iha sela Polísia.

Polísia Seksaun Investigasaun kontinua ba foti mós suspeitu  UF iha Munisípiu Ainaro hodi mai detein iha Komandu Polísia Munisípiu Díli,  Komandu Polísia Munisípiu Ainaro asegura ona suspeitu  ho inisiál  UF.

Jornalista: Juvinal Cabral dos Santos