Hatutan.com, (08 Fevereiru 2026), Díli – Membru eletivu ba estrutura Federasaun Futeból Timor-Leste periódu 2026-2030, kompromete  halo servisu konsentra iha atividade jogu juvinil ho kriasaun ka dezenvolvimentu infraestrutura.

Lee Mós: Nilton Gusmão Eleitu ba Prezidente FFTL Bá Restante Mandatu 2022-2026

Esrutura Ezekutivu FFTL periódu 2026-2030 ne’ebé lidera husi prezidente Nilton Telmo Gusmão dos Santos. Foto/FFTL

Iha  kongresu ordináriu  bad ala-13 ne’ebé hala’o iha Otél Palm Spring, Domingu (08/02/2026), Asosiasaun Futeból  hamutuk 21 fó votu aklamasaun ho basa-liman hodi  eleze  estrutura ezekutivu Federeasaun Futeból Timor-Leste, kompostu husi   Prezidente FFTL Nilton Telmo Gusmão  dos Santos,  vise prezidente- Tanente Jenerál, Domingos Raul “Falur Rate Laek”,

Membru ezekutivu sira mak hanesan Komisáriu Jerál Polísia, Henrique da Costa, Engracia Pimentel Fernandes (membru),  Faustinho Gidinho da Costa (membru), Domingos dos Santos Caero (membru), José Luis de Oliveira nu’udár mós membru ezekutivu.

Prezidente  eleitu FFTL, Nilton  Gusmão  afirma, bá  mandatu tinan haat ne’e,   konsentrasaun sei halai  liu-bá  bá infrastrutura no  buka konsentra barak liu iha atividade Juvinil sira  tanba sei la   prepara husi inisiu kedas,   husi idade ne’ebé ki’ik liu  FFTL sei hasoru difikuldade nafatin, iha  ekipa selesaun nasionál.

“Tanba ne’e maka maka servisu tinan haat ne’e, ita nia foku konsentrasaun ne’e bá iha atividade juvinil sira no mós infrastrutura, la signifika,  atividade husi seniór ita husik tiha  lae,  ita sei kontinua atividade FIFA,AFC, AFF  nian  atu nune’e ita mantein atividade organizasaun inan sira nian,” Nilton  Gusmão hateten.

Nia dehan, membru konsellu FIFA  ne’ebé ko’alia ona katak sira hothotu  hakarak  FFTL tenke iha  infrastrutura rasik atu bele lori Futeból  mai  iha Timor-Leste.

Nia hateten  jogádor joga hanesan uma na’in  utiliza estádiu husi rai li’ur,  sidadaun Timoroan ne’ebé hadomi futeból  la  partisipa didi’ak, no la konsege fó sira nia apoiu,  tanba ne’e  FFTL tenke iha infrastrutura rasik. Tanba ne’e membru FIFA rasik komprimetidu atu apoiu FFTL,

“Prezidente FIFA rasik,  bainhira ita hasoru mós  ko’alia beibeik lia fuan hanensan, katak sira hakarak atu apoiu, ita nia Govenrnu rasik mós hanensan liuliu Primeiru Ministru Kay Rala Xanana Gusmão  sempre iha komitmentu hakarak ita iha infrastrutura rasik, atu nune’e bele sai hanensan espasu bá ita nia foin sa’e sira, hodi bele atividade internasionál mai iha ita nia rain, no orgullu  ita bele lori atividade internasionál mai iha ita nian rain hanesan uma na’in,” nia dehan.

Tanba ne’e nia dehan, membru efetivu FFTL sei kontinua halo aprosimasaun ho  Govenrnu atu nune’e  halo servisu kolaborasain ida-ne’ebé di’ak,  ho Ministériu Joventude Desportu Arte no kultura, Ministériu Justisa, Governu jerál  atu nune’e garantia  realizasaun programa ne’e bele la’o.

“Atividade ne’e tanba la’o iha ita nia rain, ita presiza apoiu ema hothotu nian,  hanensan instituisaun relijiozas instituisaun organizasaun Noun Governamentál sira, setór privadu, komunidade en-jerál , komunidade hadomi Futeból sira atu nune’e  planu siez ne’ebé ita hanoin atu halo bele  realiza kuandu ema hotu-hotu iha hanoin hanensan, buka atu apoiu malu bá buat ne’ebé ita planu bele konkretiza, tanba buat ne’ebé maka ita harii la’ós harii bá ha’u harii bá ema ruma, maibé harii bá ita nia rain, harii bá ita nia Nasaun, no liu-liu  harii bá ita nia joven no foinsae sira.”

Nia subliña, durante mandatu  tinan haat ne’e  sei esforsu mós selesaun nasionál hodi hatudu performe di’ak, atu kontinua fó kondisaun bá iha nivél  kompetitibilidade  ida-ne’ebé  sufisiente atu bele kompetete ho jogu  internasionál  ne’ebé sira partisipa

Membru konsellu FIFA,  Tan Sri Dato  Haji  Hamidin Haji  Mond Amin, hateten  nia parte kontente tebes bele hamutuk ho  hotu iha fatin ida-ne’e. hamrik iha ne’e la’ós de’it hanesan kolega, maibé hanesan reprezentante  FFTL nian iha Konsellu FIFA ba rejiaun ASEAN.

“Iha okaziaun ida-ne’e, ha’u hakarak hato’o ha’u-nia kompromisu, iha nivel pesoál no profisionál, atu fó apoiu tomak ba Señór Nilton hodi hametin no hadia dezenvolvimentu FIFA iha rejiaun ASEAN. Ne’e hanesan esforsu kolektivu ida, atu fo benefísiu ba membru hotu-hotu,”  membru konsellu FIFA ne’e afirma.

Nia subliñ, nia  papél  iha FIFA mak atu garante  lian hosi Timor-Leste la’ós de’it rona, maibé bele transforma bá asaun konkretu ne’ebé iha impaktu pozitivu ba rejiaun tomak. Estabilidade mak forsa prinsipál ida ba federasaun ida.

“Ita boot sira hotu ona hili señór Nilton hanesan Prezidente, tanba ne’e ita hotu iha responsabilidade kolektivu atu fó apoiu tomak, atu bele lori federasaun ne’e ba nivel aas liután hosi etapa ida ba etapa seluk, no kontinua ba oin” dehan nia

Nia  profunda, dezenvolvimentu FFTL depende  hosi lideransa hotu bele mantein armonia no unidade iha  federasaun ida nia laran,  tenke lao hamutuk, hanesan forsa ida, hanesan ekipa ida, atu hetan susesu bá federasaun.

“Bá membru FFTL foun sira, ha’u iha konfiansa katak imi iha enerjia no determinasaun atu kontribui ba futuru di’ak liu ba federasaun Futeból Timor-Leste,” tenik nia.

Ministru Joventude Desportu Arte no Kultura (MJDAK), Nelio Isaac Sarmemto hateten hodi husu bá membru eleitu sira halo kooperasaun ho Govenrnu hodi lori Federeasaun Futeból Timor-Leste bá mundu no  lori  mundu Futeból mai Timor-Leste.

“Ita espera katak, rezultadu ida-ne’e  la’ós de’it ita fó haksolok bá imi,  no fó haksolok bá organizasaun internasionál sira,  maibé hatudu katak ita únidu hodi dezenvolve modalidade ida-ne’e rasik,” Nelio Isaac hateten.

Nia afirma, IX Governu Konstitusionál ne’e prontu  fó apoia bá organizasaun hotu-hotu,  uitoan ka   ka barak maibé objetivu ida de’it,  bá  Nasaun no no bá  Povu tomak Timor-Leste

Jornalista: Marcelino Tomae