Hatutan.com, (11 Fevereiru 2026), Díli-Reuniaun Konsellu Ministru (KM), Kuarta (11/02/2026), iha Palásiu Governu, deside  suspende rekrutamentu ajente Polísia Nasionál Timor-Leste (PNTL) foun ba tinan 2025 tanba deskonfia iha pratika favoritizmu no familiarizmu iha prosesu selesaun.

Lee Mós: FM Konsidera MI Inkapasidade no Fase-Liman iha Polémika Rekrutamentu Kadete PNTL

Ministru Interiór, Francisco da Costa Guterres. Foto/Juvinal Cabral dos Santos

Desizaun ne’e foti hafoin membru Governu sira hetan informasaun preliminar kona-bá alegasaun irregularidade iha prosesu rekrutamentu ajente PNTL foun.

Konsellu Ministru konsidera katak presiza halo avaliassaun kle’an no independente atu garante transparénsia, justisa no meritu iha prosesu rekrutamentu ba instituisaun seguransa nasionál.

“Ita rona hotu reklamasaun oioin depois ida-ne’e ami lori mai iha Konsellu Ministru tanba abertura konkursu mós Konsellu Ministru mak aprova. Entaun, ha’u lori mai KM para husu autorizasaun para atu foti desizaun,  tanba ne’e mak ohin mai aprezenta iha KM deside katak primeiru ita  suspende tiha lai konkursu ne’e rasik,” Ministru Interiór (MI) Francisco da Costa Guterres informa ba jornalista sira hafoin reuniaun Konsellu Miistru.

Nia afirma, suspende tiha konkursu ne’e tanba presiza halo uluk averiguasaun, análize didi’ak fila-fali públika sai.

“Segundu, KM mandata ha’u atu re-estrutura fali  komisaun verifikasaun no suprevizaun, komisaun ida ne’e kompostu husi entidades oin-oin, ita inklui tan mós ema internasional hanesan Guarda Nacional Republicana (GNR) husi Portugál, no husi Austrália ho tan ema balun ne’ebé mak ho di’ak, atu nune’e, bele fó servisu ba sira loron 20 para atu halo revizaun tomak ba revizaun konkursu ne’e rasik,” Ministru Interiór Francisco da Costa Guterres esplika.

Nia hatutan, depois iha loron 20 ne’e mak haree no rekomenda mai iha liuhusi Ministériu Interiór depois hato’o ba Konsellu Ministru kona-bá medida saida mak bele foti.

Suspensaun ne’e la’ós atu hapara rekrutamentu permanente, maibé atu fó tempu ba autoridade kompetente sira halo auditoria no verifikasaun dokumentu hotu-hotu ne’ebé liga ba prosesu selesaun kandidatu sira.

“Sé hetan problema ruma ita bele halo revizaun totál ba ida ne’e ou bele mós halo fila-fali parsialmente konkursu la’o para ninia konkursu ne’e la’o ho di’ak,” MI Francisco Guterres esplika.

Komisaun verifikasaun ne’e sei mai husu Portugál, Austrália, no Ministériu Edukasaun tanba sira mak fasilita prova kulturál ba sira.

Jornalista: Juvinal Cabral dos Santos