Hatutan.com, (11 Marsu 2026), Díli-Investigasaun ba kazu pesoál Servisu Migrasaun iha Postu Integradu Fronteira Batugade ne’ebé deskonfia fasilita sidadaun Indonézia (WNI, sigla Indonézia) ho identidade Dirsie Graciela Lopes, hakuur liu froteira ho estatutu pasaporte overstay, la hatudu violasaun grave ba lei ka regulamentu sira aplikavel iha Migrasaun Timor-Leste nian.

Lee Mós: Kazu Pesoál Servisu Migrasaun La Fó Sansaun Ba WNI Feto Ida Overstay iha Investigasaun

Prova iha dokumentu pasaporte WNI nian ne’ebé tau karimbu Alerta. Foto/Repro

Foin lalais ne’e, iha mídia sosiál Facebook viral loos ho postajen Dirsie Graciela Lopes,  WNI feto ida bainhira hakuur iha Postu Fronteira Batugade, Bobonaro, pesoál Servisu Migrasaun la aplika sansaun administrativa, maibé tuir informasaun, katak pesoál Servisu Migrasaun ne’e tau karimbu Alerta iha WNI ne’e nia passaporte tuir rekizitu propriu Migrasaun nian.

Liu husi investigasaun husi parte kompetente sira, komprova katak  medida sira ne’ebé pesoál Servisu Migrasaun ho identidade Olivio Pinto atua ba WNI feto ida ne’ebé overstay ne’e kumpre rekizitu sira aplikavel iha regulamentu Servisu Migrasaun  nian.  

Diretora Ezekutiva Servisu Migrasaun, Superintendente-Xefe Polísia Natércia Eufrásia Soares Martins, klarifika kazu pesoál Servisu Migrasaun Olivio Pinto fasilita sidadaun Indonézia ho identidade Dirsie Graciela Lopes ne’ebé overstay no visa mate ne’e tau karimbu Alerta nune’e  la komete irregularidade.

“Hanesan promete ona rezultadu husi nia prosesu ami sei públika fila fali ba públiku atu bele hatene iha tempu ne’ebé ami simu informasaun kona-bá alegasaun kontra ita-nia membru ida ne’ebé tuir informasaun iha média sosiál dehan katak nia fasilita sidadaun Indonézia ida sai husi fronteira no kontra regra,” Diretora Ezekutiva Servisu Migrasaun, Superintendente-Xefe Polísia Natércia Eufrásia Soares Martins, ba jornalista sira iha Ministru Interiór (MI), Kuarta(11/03/2026).

Diretora Ezekutiva Servisu Migrasaun ne’e, esplika, bainhira sira simu informasaun husi média halo kedas asaun imediatamente forma ekipa ida halo ona  investigasaun.

“Iha prosesu investigasaun ne’e ita foti informasaun, ita rekolla dadus sira hotu evidensia husi testemuña no mós evidensia fiziku hanesan sistema no pasaporte raziku, liuhusi koordenasaun servisu Migrasaun nian ho ita nia parseiru husi autoridade Indonézia ninian no mós esforsu husi ita nia adida ne’ebé koloka iha fronteira ita konsege hetan individu ne’e nia pasaporte no mós karimbu ne’ebé tau bainhira nia sa,i” Natércia Eufrásia Soares Martins hatutan.

Nia esplika, durante investigasaun evidensia sira ne’ebé foti no mós informasaun husi individu sira ne’ebé mak haree prova katak pesoál Servisu Migrasaun Olivio Pinto hola desizaun tuir hela regra.

Nia afirma tan katak, tuir Leí depois liu tinan rua ka tolu mak bele tama Timor-Leste, bainhira tama fali mai mós nia tenke halo pagamentu hafoin tama tanba iha nia sistema no pasaporte iha ona sinál alerta.

“Entaun evidensia ne’ebé ita rekolla indika katak iha nia pasaporte iha alerta sai ninian katak nia hetan multa, maibé nia la multa bainhira nia tama nia tenke selu fali multa no mós iha sistema alerta iha ne’ebá katak individu ida-ne’e  la selu multa iha overstay loron ida signifika nia vistu loron ida,” Diretora Ezekutiva Servisu Migrasaun Natércia Eufrásia Soares Martins salienta.

Pesoal servisu migrasaun ne’e mós nia la’ós servisu iha área tau karimbu maibé hanesan tezoreira nia simu osan ba ema sira ne’ebé mak hetan prega multa nia la iha ligasaun ho karimbu ne’ebé mak tau iha ne’ebá.

Tuir loloos sidadaun Indonézia ho naran Dirsie Graciela Lopes refere selu multa overstay ka visa mate ne’e osan montante US$150.00.

Jornalista: Juvinal Cabral dos Santos