Hatutan.com, (18 Marsu 2026), Díli-Manifestasaun kadetes foun Polísia Nasionál Timor-Leste (PNTL) ba loron-datoluk nian hasoru Ministru Interiór, Francisco da Costa Guterres, Kuarta (18/03/2026), rezulta ema na’in-hitu (7) kanek no tenke evakua ba halo tratamentu iha Sentru Saúde Vera Cruz, Díli.

Lee Mós: Kadete PNTL Ezije Anula Totál Prosesu Rekrutamentu PNTL

Manifestante balun halo tratamentu iha Sentru Saúde Vera Cruz, Díli. Foto/Juvinal Cabral dos Santos

Manifestasaun ne’ebé konsentra iha resintu Faculdade de Ciências Sociais e Políticas-Universidade Nasionál Timor-Lorosa’e (UNTL) ne’e, mosu anárkizmu ka tuda-malu entre manifestante sira ho autoridade seguransa sira, ne’ebé rezulta parte PNTL nia membru na’in-haat (4) kanek no manifestante na’in-tolu (3) mós kanek.

Observasun Hatutan.com, iha lokál manifestasaun, hale’u tuku 14:50 Otl, kadetes PNTL sira hala’o asaun pasifika ne’e mosu dezintendimentu ho autoridade seguransa, nune’e ema balu (deskonfia terseira parte) hahú tuda fatuk tama ba manifestante sira inklu tuda mós ba parte PNTL  hodi rezulta membru polísia na’in-ida hetan panakada maka’ás iha parte ain karuk, inklui membru PNTL na’in-tolu seluk ne’ebé kanek iha parte liman, ulun no ain.

Manifestante na’in-tolu mós kanek, no balun dada iis ladi’ak tanba polísia atua ho tiru gás lakrimojéniu,  nune’e autoridade seguransa sira lori kedas sira ba iha Sentru Saúde Vera Cruz hodi halo tratamentu.

Tuir informasaun  husi manifestante sira ne’ebé akompaña nia kolega iha Sentru Saúde Vera Cruz katak sira nia maluk nain-tolu ne’e kanek’ na’in-ida hetan grave no rua seluk kanek tanba baku husi polísia sira, baku uza stick, tuku-tebe to’o lori mai tratamentu.

Hatutan.com mós nota katak asaun tuda dahuluk ba manifestante sira ne’e hahú husi parte balun ne’ebé deskonfia pesoál funsionáriu apontamentu polítika iha Ministériu Interiór, inklui Polísia balun uza roupa sivíl. Ho nune’e, maniferstante sira mós responde ho tuda fatuk ba Polísia sira to’o situasua la bele kontrola no obriga Polísia tenke tiru gás lakrimojéniu.

Iha Sentru Saúde Vera Cruz  autoridade seguransa polísia nafatin halo seguransa ba manifestante no membru PNTL sira ne’ebé hala’o hela tratamentu intensivu.

“Ha’u ohin negósia hela ho komandante sira atu iha modalidade ida mak Komandu munisípiu Díli ho ninia portavós sé mak iha hakbesik ba estudante no kadete sira hodi lori sira nia portavós atu hasoru Ministru Interiór (MI) ka nia gabinete ne’ebé mak iha poder atu bele fó solusaun,” Diretór Ezekutivu FFONGTIL, Inocéncio de Jesus Xavier informa ba jornalista sira iha arradór edifisiu Minitériu Interiór.

Sosiedade sivíl afirma, negosiasaun ne’e la’ós ho polísia sira, maibé liuliu parte Ministériu Interiór mak iha kompeténsia atu fó solusaun ba kestaun kadete sira nian.

Membru PNTL balun ba halo tratamentu iha Sentru Saúde Vera Cruz tanba sofre kanek iha ain. Foto/Juvinal Cabral dos Santos

“Klaru katak prosesu balun la’o hela tanba ne’e mak Komisaun Suprevizaun ida simu mandatu loron 20 ne’e haree fila fali prosesu rekrutamentu hotu ne’ebé la’o tiha ona ne’e oinsá. Entaun komisaun ne’e to’o tiha agora ita seidauk hatene sira nia andamentu prosesu ne’e la’o to’o iha ne’ebé entaun sira ho situasaun sira ne’e halo asaun ida-ne’e,”  Inocencio de Jesus hateten.

FONGTIL rekomenda ba Ministériu Interiór promove lalais ekipa maratona ida hamutuk Komandu Munisípiu Dili, atu nune’e, kontaktu ho portavós demostrante sira atu hasoru Ministériu Interiór hodi foti solusaun, sé parte rua MI ho kadete sira ida-idak ho nia pozisaun sei la rezolve problema.

Iha fatin hanesan Komadante Unidade Espesiál Polísia (UEP) Superintendente Polísia Damião Correia, hateten,  observasun hotu-hotu haree hahú kedas demostrasaun inisiu to’o ohin loron sira iha direitu halo asaun.

“UEP mai apoiu Komandu Munisípiu Díli para nafatin asegura situasaun ne’ebé mak agora ita hotu hamutuk haree, UEP mai apoiu no koloka iha ne’e hodi tau-matan no normaliza situasaun ne’e,” Superintendente Polísia Damião Correia, informa ba jornalista sira.

Autoridade seguransa ne’e informa manifestante sira mantein respeita ba asaun pasifika ida ne’e, maibé kuandu iha anarkizmu ruma mak hein Komandu operasaun orienta ona mak Komandu Munisípiu Díli labele atua ona grau ne’e aumenta, entrega ba UEP prepara halo atuasaun tuir orden.

Maske iha anarkismu balun, tuda maibé autoridade seguransa tenta no hapara situasaun sira ne’e haruka manifestante sira tama ba iha arredór UNTL nian atu labele okupa estrada públiku hodi mosu engarafamentu.

Ministériu Interiór (MI) Francisco da Costa Guterres informa katak, kadete PNTL sira hatene ona katak foin lais governu fó sai tiha ona katak iha hela komisaun ida halo hela servisu sira hein lai lalika ansi halo manifestasaun.

“Husik komisaun ne’e halo servisu, komisaun ne’e mak sei aprezenta nia rezultadu ba iha governu, ita hein hein katak semana oin sira hato’o ona relatoriu ne’e mai depois mak governu foti desizaun tuir rekomendasaun ne’ebé mak sira fó”, Ministériu Interiór (MI) Francisco da Costa Guterres informa iha Palásiu Governu.

Komisaun  suprevizaun no fiskalizasaun hahú hala’o ona nia servisu no buka tuir ona dokumentus sira ne’ebé iha loron balun nia laran sira sei hakerek relatóriu ikus hodi semana oin propoin ba iha Konsellu Ministru.

“Ha’u husu ba kadete PNTL foun sira hakarak sai polísia tenke sai disiplina, hodi hein desizaun ne’e no hein rekomendasaun husi komisaun depois governu foti tuir komisaun sira fó, tanba uluk kadete sira nia reklamasaun ne’e mak ita kria komisaun hodi halo revizaun ne’e agora mai tan fali saida tan, servisu seidauk hotu mai tan halo saida,” Ministru Francisco da Costa Guterres hateten.

Ministru Interiór garante komisaun sira ne’e kompostu husi ema ne’ebé iha kbiit kapasidade no esperiénsia  hodi halo revizaun bá prosesu ne’e atu la  hamosu konflitu interese iha rezultadu investigasaun no lavantamentu sira.

Jornalista: Juvinal Cabral dos Santos