Hatutan.com, (10 Abríl 2026), Díli-Polísia Nasionál Timor-Leste (PNTL) submeter on aba Ministériu Públiku kazu violénsia doméstika, katuas-oan baku ferik-oan Asistente Inspetora Polísia iha resintu Kuartel Jerál PNTL.

Lee Mós: Katuas-Oan Baku Ferik-Oan Nu’udár Inspetora Asistente Polísia iha Kuartel Jerál PNTL

“Hafoin akontesimentu, Kinta (09/04/2026), autopridade kompetente atua kedas, bolu suspeitu ho inisiál  VCS halo identifikasaun no Sesta ohin, ita aprezenta ona ba iha Ministériu Públiku (MP) hodi hein prosesu tuir mai,” Portavós PNTL Superintendente Xefe Polísia João Belo dos Reis, ba jornalista sira iha Kuartel Jerál PNTL, Sesta (10/04/2026).

Superintendente Xefe Polísia João Belo dos Reis, esplika, kazu ne’e konsidera  krime ofensa integridade ba fizika simples previztu iha artigu 146° Kodigu-Penál, maus tratus ba konjuje artigu 154° Kodigu-Penál, no Dekreitu-Lei numeru 07/2010 kona-bá violénsia doméstika.

“Ita konsidera ida-ne’e iha Kuartel Jerál PNTL la’ós problema abuza malu ka rezolve problema família iha ne’e, buat ruma la di’ak sempre ko’alia  bá malu,” Superintendente Xefe Polísia João Belo dos Reis afirma.

Jornalista: Juvinal Cabral dos Santos