Hatutan.com, (10 Abríl 2026), Díli– Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) ho Servisu Nasionál Intelijénsia (SNI) no Polísia Baucau ezekuta mandadu Tribunál Judisiál Primeira Instánsia Baucau (TJPIB) hodi kondenadu ho identidade António Freitas Belo  ba kumpre prizaun tinan-ualu iha Sentru Estabelesimentu Prizionál Becora.

Ilustrasaun

Kondenadu António Freitas Belo hetan pena tinan-ualu komarka husi Tribunál Judisiál Primeira Instánsia Baucau tanba provadu komete krime violasaun seksuál hasoru  vítima RdS iha Suku  Uailili, Postu Administrativu-BauCau Villa, Munisípiu Baucau iha tinan 2020.

Kondenadu António Freitas Belo komete krime violasaun seksuál ne’ebé previstu iha  artigu 172° no mós  komete   krime autoria ne’ebé previstu no punidu iha artigu 30° husi Kódigu Penál Timor-Leste.

Bazeia ba mandadu Tribunál ne’e, Kinta (09/04/2026),  hale’u tuku 08:00 dadeer Otl,  buka tuir no kaptura kondenadu António Freitas Belo lokaliza kondenadu nia fatin iha área Aldeia 05, Suku Caicoli, Postu Administrativu Vera- Krúz Munisípiu Dili.

Hafoin ekipa konjunta kaptura tau  aljema ba kondenadu António Freitas Belo nia liman lori kedan ba iha edifisiu Diresaun Servisu Investigasaun Kriminál (DSIK) hodi sertifika molok lori ba estabelesimentu Prizaun Becora hodi kumpre nia pena tinan-ualu.

Portavós PNTL Superintendente Xefe Polísia João Belo dos Reis, haktuir, DSIK apoiu Komandu Munisípiu Baucau parte investigasaun Kriminál  hodi detein sidadaun balun.

Jornalista: Juvinal Cabral dos Santos