Hatutan.com, (10 Maiu 2026), Díli-Polísia Nasionál Timor-Leste (PNTL) detein membru FALINTIL-Frosa Defeza Timor-Leste (F-FDTL) ida ho naran insiál GDS, inklui suspeitu balu tan tanba envolve iha kazu omesídiu ne’ebé halakon Vicensio Fernandes nia vida iha Aldeia Poros, Suku Mehara, Postu-Administrativu Tutuala, Munisípiu  Lautem, Sabádu kalan (09/05/2026).

Polísia detein suspeitu sira ba kazu omesídiu iha Aldeia Poros, Domingu (10/05/2026). Foto/supply

Tuir kronolojia ne’ebé Hatutan.com rekolla husi fontes oioin husi Aldeia Poros, hateten iha Sabádu kalan, festa kore-metan iha família balu iha Aldeia Poros. Serimonia dezlutu ne’e la’ó ho di’ak loos no trankulidade, maibé to’o Domingu dadeer, haleu tuku 02:00 Otl, mosu dezentendimentu entre parte festa na’in ho komunidade balun mai husi Asalaino ne’ebé ba asiste mós festa barlake ida iha Aldeia Poros.

Iha dezentendimentu ne’e rezulta konfrontu fiziku entre parte balun husi Asalaino ho feta na’in dezlutu iha Aldeia Poros ne’ebé rezulta  Vicensio Fernandes lakon vida.

Hafoin akontesimentu ne’e, Polísia Munisípiu Lautem asegura kedas suspeitu sira, inklui membru   F-FDTL ho naran inisiál GDS hodi submeter ba idnetifikasaun no inkéritu.

Jornalista: Juvinal Cabral dos Santos