Hatutan.com, (25 Maiu 2026), Díli–  Eis-Primeiru Ministru no eis-Prezidente Autoridade Rejiaun Administrativu Espesiál Oé-Cusse Ambenu (RAEOA), Mari Bin Amude Alkatiri, prontu enfrenta  desizaun Tribunál  ho Ministériu Públiku relasiona ho kazu Ró Haksolok.

Lee Mós: Breaking News: Mari Alkatiri Presta Deklarasaun iha MP Kona-bá Kazu Ró Haksolok

Mari Alkatiri preste deklarasaun iha MP, Segunda (25/05/2026). Foto/Marcelino Tomae

Fundadór RDTL, Mari Bin Amude  Alkatiri,   Segunda  (25/05/2026), presta deklarasaun iha Ministériu Públiku, hahú husi tuku 09:36 no remata tuku 11:00 Otl iha Ministériu Públiku, Colmera, Díli.

“Ha’u mai iha ne’e tanba ha’u respeita institusaun judisiáriu, la’ós hanesan ema balun ne’ebé bainhira bolu, la mai. Ha’u respeita institusaun judisiáriu, ne’e maka ha’u mai,” Mari Alkatiri hateten ba jornalista sira.

Eis-Prezidente  RAEOA ne’e afirma katak hakarak hametin independénsia judisiáriu no husu públiku atu akompaña prosesu ne’e.

“Ha’u hakarak hametin Judisiáriu sai independente. Saida maka iha laran ne’e segredu justisa. Ha’u sei prontu, imi akompaña de’it, luta ne’e foin hahú,” nia dehan.

Iha oportunidade ne’e, Mari Alkatiri mós afirma katak nia prontu atu enfrenta prosesu legál iha tribunál no Ministériu Públiku.

“Ha’u nunka hanoin atu halai husi Tribunál no Ministériu Públiku hanesan ema balun,” nia hatete.

Jornalista:Marcelino Tomae