Hatutan.com, (19 Juñu 2026) Díli – Komisáriu  Asistente Polísia na’in-haat ne’ebé tseidauk iha atribuisaun servisu simu saláriu tuir knaar nu’udár komisáriu asistente polísia  iha instituisaun Polísia Nasionál Timor-Leste (PNTL).

Ministru Interiór Francisco da Costa Guterres.

Ministru Interiór, Francisco da Costa Guterres, Sesta (19/06/2026), konfirma   katak,  komisáriu asistente polísia a’in haat ne’e seidauk hetan kolokasaun permanente no  sira kontinua simu saláriu tuir nia patente no divizaun tanba direitu ne’e garantia husi lei.

“Saláriu bazeia bá divizaun, la’ós bazeia de’it bá kargu ne’ebé  sira okupa. Hanesan funsionáriu públiku ida ne’ebé iha grau A, nia iha direitu atu simu saláriu tuir nia grau, mezmu nia la okupa kargu ruma,” Ministru Francisco  da Costa Guterres esplika.

Membru Governu ne’e hatutan interpretasaun  laiha atribuisaun servisu ba komisáriu asistente na’in-haat  maibé kontinua presta servisu  bá instituisaun  PNTL no bele fó asesoria no konsellu ba Komandu Jerál bainhira presiza.

“Komisáriu Asistente sira bele iha gabinete Komandante Jerál no fó konsellu ba dezenvolvimentu PNTL. Ida-ne’e mós servisu ida,” Franicisco Guterres hateten.

Nia   profunda, lei la obriga Komandante Jerál atu atribui kedas pozisaun bá ofisiál superior sira ne’e, tanba atribuisaun servisu tenke ajusta ho estrutura  no nesesidade institusaun PNTL nian.

“Komisáriu Asistente na’in haat ne’ebé seidauk hetan atribuisaun servisu, ida-ne’e Komandante Jerál PNTL nia kompeténsia. Ha’u laiha ona kompeténsia bá assuntu ne’e tanbá lei  hatete tiha ona katak Komandante Jerál maka iha podér atu koloka sira iha fatin ne’ebé apropriadu,” hatete Ministru Interior Francisco Guterres.

Tuir lista ne’ebé Hatutan.com asesa katak  Komisáriu Asistente Polísia na’in-haat seidauk hetan atribuisaun servisu instituisaun Polísia Nasionál Timor-Leste (PNTL) mak hanesan  Kmisáriu Asistente Polísia Arnaldo de Araújo,  Komisáriu Asistente Polísia Ocativio Bucar, Komisáriu Asistente Polísia Mateus A. Mendes ho Komisáriu Asistente Polísia Antoninho Mauluta.

Jornalista: Marcelino Tomae