Hatutan.com, (23 Juñu 2026), Díli–Prezidente Repúblika, José Ramos-Horta, afirma Estadu tenke tau-matan duni ba faluk, oan-kiak sira, hanesan Estadu tau-matan ba faluk hotu-hotu, oan kiak sira hotu-hotu iha Timor-Leste.

Lee Mós: Bispu Sira Presta Omenajen Ba Maktoban Francisco Guterres Lú-Olo

PR Josè Ramos-Horta fó omenajen ba maktoban eis-PR Lú-Olo no afirma Estadu iha obrigasaun tau-matan ba faluk no oan-kiak sira, Tersa (23/06/2026). Foto/Marcelino Tomae

“Ita sei haree. Primeiru tuir lei ne’ebé  vigora, se lei  laiha tenke kria, haree lejislasaun ne’ebé dignu hodi fó apoiu ba família hanesan Prezidente Lú-Olo nian. Veteranu ida tinan 24 desde 1974,” Xefe Estadu hateten bainhira fó omenajen ba maktoban eis-PR Franicsco Guterres “Lú-Olo” iha Farol, Tersa (23/06/2026).

Xefe Estadu informa katak  semana  liubá, nia halo vizita perivadu ba  Malázia hodi halo lansamentu livru no halo palestra. Nia  hakarak tebes ba vizita Prezidente Lú-Olo. Timor-oan ida  iha hospital. Ba duni, maibé to’o iha ne’eba, ko’alia ho eis-primeira dama Sra. Cidalia Mourzinho Guterres. Tanba momentu ne’e Prezidente Lú-Olo iha tiha ona ICU ho penimonia, no fila mai Timor-Leste iha Aeroportu temi ba vizita, maibé la hatete buat ida kona-bá nia estadu klíniku, tanba ne’e la’ós kompetensia, doutor mak bele hatete.

“Purtantu sempre ho respeitu boot ba ema ne’ebé luta iha rai-laran, ema ne’ebé serbí Estadu no povu. Prezidente Lú-Olo, ita lakon boot ida ba nasaun,” Xefe Estadu afirma.

 Prezidente Repúblika, José Ramos-Horta, hateten Timor-Leste lakon kombatente no erói Francisco Guterres Lú-Olo ne’ebé hanesan fundadór no aman ba nasaun ne’e.

“Ita lakon kombate ida, veteranu tinan 24 luta ba independénsia, lakon polítiku ida, lakon erói ida ne’ebé servi iha Estadu, luta armada, polítika lideransa másimu FRETILIN nian iha rai laran,” Ramos-Horta subliña tan.  

PR Ramos-Horta presta omenajen ba eis-PR Lú-Olo. Foto/Média GPR

Ramos-Horta hatutan, saudozu Francisco Guterres Lú-Olo nia dalan tranzitoria ne’e kompletu, hanesan Prezidente Assembleia Konstituiente, depois Prezidente Parlamentu Nasionál too Prezidente Repúblika. Tanba ne’e nia partida hanesan lakon boot, la’ós de’it ba lideransa FRETILIN maibé ne’e lakon boot ba Estadu.

“Mais ne’e sei fó nia eransa, nia legadu sei fó inspirasaun ba povu tomak, ba joven sira, inspirasaun ba FRETILIN, kontinua buat ne’ebé Nicolau Lobato rai hela iha rai laran. Ba li’ur Dr. Marí Alkatiri, ba ita hotu-hotu nune’e hanoin buat ne’ebé nia kontribui atu kontinua kaer metin rai ida ne’e iha dame nia laran, liberdade, demokrásia nia laran,” Horta hateten.

Jornalista: Marcelino Tomae