Hatutan.com, (03 Jullu 2026) Díli- Diretór Ezekutivu  Servisu Migrasaun,  Komisáriu Asistente Polísia Jorge Monteiro, Sesta (03/7/3036), informa katak sira-nia parte lahatene objetivu no atividade husi sidadaun estranjeiru na’in-tolu ho nasionalidade Indonézia ne’ebé tama mai teritóriu Timor-Leste no atu sai fali ho private jet “siluman” iha Aeroportu Internasionál Preizdente Nicolau Lobato ne’ebé sai polémika.

Lee Mós: Private Jet “Siluman” Cesna C700 Fila Ona Ba Jakarta

Autoridade Servisu Migrasaun halo konfirmasuan ho dokumentu Indonéziu na’in-tolu ne’ebé atu sai ho privat jet “siluman” iha Aeroportu IPNL, Kuarta-loraik (01/07/2026). Foto/Supply

Komisáriu Asistente Polísia Jorge Monteiro, klarifika katak Indonéziu  na’in-tolu ne’e mai Timor-Leste iha loron 29 Juñu 2026, maibé objetivu prezensa to’o fila, Servisu Migrasaun lahatene sira nia atividade, tanba Migrasaun nia papel haree ba iha entrada no saida, no kona-bá prezensa privte jet “siluman” iha Aeroportu IPNL mós  parte Servisu Migrasaun  la iha kompeténsia.

Private Jet “siluman” ne’e charter husi empreza ka ajensia Jetrans ne’ebé tuir dokumentu  katak sai  husi Aeroportu Halim Perdana Kusuma-Jakarta mai Díli, Timor-Leste, Kuarta-lokraik (01/07/2026), hodi tun iha Aeroportu INPL por volta 17:15 Otl atu tula sidadaun Indonézia na’in-tolu ne’e.

Privet jet “siluman” ho tipu cessna citation C700 rejistrasaun  nasaun Indonézia ne’e fila-fali on aba Indonézia, Kinta-meiudia (02/07/2026).

Hafoin halo investigasaun ba private jet “siluman” ne’ebé utiliza mós Prezidente Repúblika nian no  Indonéziu na’in-tolu ne’e, iha Kinta-ne’e, hale’u tuku 09:00 dadeer Otl, sira sai fali ho ho aviaun komersiál Aero Dili.

“Relasiona ho informasaun ne’ebé virál iha média sosiál aviaun jet privadu ne’ebé atu mai tula sidadaun balun iha Timor-Leste, ha’u hakarak akresenta  parte Servisu Migrasaun ne’e nia papel haree ba iha entrada no saida. Sidadaun sira nasionál no internasionál tama ho sai iha teritóriu nasionál Timor-Leste,” Diretór Ezekutivu  Servisu Migrasaun Komisariu Asistente Polísia Jorge Monteiro informa ba jornalista sira iha Ministériu Interiór, Sesta (03/07/2026).

Diretór Ezekutivu Servisu Migrasaun afirma, kona-bá aviaun private jet “siluman” nia prezensa atu tula ema ruma ne’e fora husi papel Servisu Migrasaun.

Diretór Ezekutivu Servisu Migrasaun Komisariu Asistente Polísia Jorge Monteiro. Foto/Juvinal Cabral dos Santos

“Servisu Migrasaun nia papel ka  portu foliu ne’e mak atu garante ema ne’ebé  tama iha teritóriu nasionál Timor-Leste ne’e nia tama ho rekizitu ne’ebé mak iha lei no regulamentu sira,” Diretór Ezekutivu Servisu Migrasaun salienta.

Servisu Migrasaun nia papel ne’e atu garante katak sidadaun internasionál ka sidadaun  ne’ebé sai husi Timor-Leste ne’e preinxe rekezitu no tuir prosedimentu ne’ebé legál hodi bele sai ba iha li’ur no tama fila-fali, agora relasiona ho aviaun no buat sira seluk ne’e la’ós papel migrasaun ninian.

“Ha’u atu hateten katak ema na’i- tolu ne’e mai iha ita nia rai  ne’e sira nia atividade atu halo saida-saida ne’e la’ós papel Servisu Migrasaun nian. Buat ne’ebé ha’u hakarak hateten katak ema na’in-tolu ne’ebé tama mai teritóriu nasionál Timor-Leste sira tama ho legalmente tanba sira preinxe dokumentu no rekezitu sira ne’ebé  nesesita antes tama iha Timor-Leste”, Diretór Ezekutivu Servisu Migrasaun informa tan.

Nia hatutan, sidadaun estranjeiru  sira nia atividades ne’e la’ós Servisu Migrasaun nia kompeténsia.

Relasiona sira Indonéziu na’in-tolu ne’e nia dokumentu, Komisariu Asistente Polísia Jorge Monteiro, esplika  sira nia entrada  iha  teritóriu Timo-Leste iha loron 29  Juñu 2026 tuir lei no regulamentu legál, tanba sira preinxe dokumentu ne’ebé iha no tuir prosedimentu sira nu’udar sidadaun estranjeiru.

Lee Mós: Sidadaun Indonézia Na’in-Tolu Ne’ebé Atu Sai ho Jet Privadu Deskonfia Sai Ona husi Teritóriu Timor-Leste

Jornalista: Juvinal Cabral dos Santos