Hatutan.com, (06 Jullu 2026) Díli-Primeiru-Ministru (PM),  Kay Rala Xanana Gusmão, Segunda (06/07/2026), hakat to’o Kuartel Jerál Polísia Nasionál Timor-Leste (PNTL) hodi buka hatene intervensaun Polísia nian ba konfrontu iha Laclubar, Munisípiu Manatuto, ne’ebé rezulta uma 13 hetan sunu no vitíma sira tenke evakua ba fatin seguru.

Ema sunu uma iha Laclubar, Munisípiu Manatuto, Domingu-kalan (05/07/2026). Foto/Supply

Konfrontu ne’ebé deskonfia akontese entre komunidade Suku Orlala ho Sertula, Postu Administrativu Laclubar, Manatuto, akontese iha Domingu-kalan, 5 Jullu 2026. Nune’e, autoridade kompetente sira halo hela investigasaun profunda hodi hatene loloos motivu husi akontesimentu ne’e.

Portavóz PNTL, Superintendente-Xefe Polísia João Belo dos Reis, Segunda (06/07/2026), haktuir,  konfrontu entre joven sira husi Suku Orlala no Sertula, rezulta uma hamutuk-13 mak ahi han no uma-lima sunu mutuk.

“Depois akontesimentu ne’e, polísia Eskuadra Laclubar no Manatuto halo kedas intervensaun hodi kaptura sidadaun hamutuk na’in-14 ne’ebé daudaun iha hela sela detensaun Polísia Manatuto,” Superintendente-Xefe Polísia João Belo dos Reis informa  ba jornalista sira.

Portavóz PNTL hatutan, kona-bá kazu ne’e  prosesu investigasaun la’o hela  no suspeitu sira autoridade asegura ona na’in-14, prosesu ne’e kontinua tempu badak sei fó sai nia rezultadu.

“Kona-ba motivu prosesu investigasaun sei la’o hela, husu maluk sira nia pasiensia atu akompaña depois iha tempu balun ami sei up-date ba ita boot sira. Kazu ne’e la’ós husi arte- marsiais, no  kona-ba naok karau mak nia kontinuasaun to’o iha ne’ebá ne’e ita seidauk hatene tanba nia prosesu investigasaun sei la’o hela,” Portavós PNTL hateten.

Iha konfrontu ne’e, la rezulta vítima ruma ne’ebé kanek ka mate, maibé  prosesu investigasaun sei kontinua la’o hodi buka tuir no identifika ema sira ne’ebé envolve nune’e sira responsabiliza ba aktu ne’ebé sira komete.

Jornalista: Juvinal Cabral dos Santos